Khawpui 3-ah dan loa bungraw zawrh man

Legal Metrology enforcement-te chuan nimin khan Aizawlah dawr hrang hrang an endik leh a, dan loa zawrh bungrua eng emaw zat an man leh. Lunglei leh Kolasibah pawh dawr hrang hrang endik niin, bungraw báwma a man inziak (MRP) aia sanga zawrh leh MRP inziak tihchhiat eng emaw zat an man bawk.

Legal Metrology-te hian Novem­ber 6, Thawhṭanni aṭang khan Aizawlah dawr endik beihpui an thlak ṭan a; a ni hmasa berah hian motor part zawrhna dawr pali endik hmanin, MRP tireha a man pena ziah leh belh hnan item chi hrang 90 chuang an man. Niminah pawh Bawngkawnah dawr paruk an endik leh a, dawr pali aṭangin dan loa zawrh bungrua eng emaw zat an man leh a; dawr pahnih aṭang erawh chuan man an nei lo.

Aizawla Legal Metro­logy enforce­ment-te hian dawr endik hna hi vawiinah pawh an chhun­zawm leh dawn a; Novem­ber thla chhung chu kalpui phawt an tum a ni.

Lungleiah chuan Le­gal Metro­logy enforce­ment squad-te chuan police nen ṭang dunin nimin khan motor part leh electric bungrua zawrhna dawrte an endik a; electric bungjrua zuarte'n dan an bawhchhe lo tlangpui a, motor part zuarte zingah erawh dan bawhchhia an tam hle tih an sawi.

Lungleia Legal Me­tro­logy mite hian dan bawhchhiaa zawrh bung­ruate chuan mansak a; an mante chu Maximum Retail Price (MRP) tih­reha ziah hnan leh decla­ration kim lo vanga mante niin, dawr pariat aṭangin motor part chi hrang 52 an man a ni.

Nimin vek khan Lung­­lei-ah hian Legal Metro­logy-te chuan dawr pakhat angin dan loa ram dang meizial zawrh (foreign cigarrette) báwm 68 an man bawk.

Kolasib-ah pawh Legal Metro­logy enforce­ment staff-te chuan motor part leh electric bugnraw zawrhna dawrte endikin, motor part dawr pahnih leh electronic dawr 13 aṭangin MRP tihreh, tihchhiat, bel hnan leh MRP awm lo bungrua eng emaw zat an man. Dan bawhchhetute chu Legal Metrology office-ah koh an ni dawn.

Kolasib-a an thil man­te chu The Legal Metro­logy (Packaged Commodities) Rule 2011, rule 6 leh 18 an bawhchhiat vang a ni a, Rs. 5,000 chawitir emaw, lung-in tàntir emaw thlenga hrem theih a ni.

Aizawl, Lunglei leh Kolasib bakah, district khawpui dangahte pawh Legal Metrology hian The Legal Metrology(Package Commo­dities) Rules 2011 hmangin dan bawhchhiate dap zel an tum a ni.