PC sorkarin rohlu tam tak a hnutchhiah - MPC President

MPC president Lal­hmangaiha Sailo chuan nimin khan an party pisaa inkhawmah thu sawiin, tun hnaia chief minister Lal Thanhawla'n Brig. T Sailo kaihhruai PC sorkarin hma­lakna chhuanawm an nei lo anga a sawi chu a hriat reng loh vang nia a rin thu a sawi a, "PC sorkar chhung khan hmalakna chhuanawm tak tak, chhin­chhiah tlak leh ṭhang­tharte rohlu tam tak hnutchhiah a ni," a ti.

Lalhmangaiha Sailo chuan, "Brig. T Sailo kaih­hruai PC party chuan ram­ buai karah kum ruk vel chhung sorkarna a chelh chhungin opposition party-te'n harsatna an siam reng karah ram tan hna ropui tak tak a thawk a ni," a ti a; Zo fate inpumkhatna leh inzawm khawmna, ramri humhalh leh ṭhangtharte rilru puthmang a dik theih nan awmze nei takin hma an lak niin a sawi.

MPC President sawi danin, PC sorkarin kawlphethaah chak takin hma an la a, PWD hnuaia wing pakhat anga awm ṭhin chu department hranpain dah a ni. Tlawng lui chu Bairabi-ah khuah tumin, January 7, 1982-ah a lungphûm a ni a, kum 1990-a hawn hman beisei ni mah se, a hnua Congress sorkarin a chhunzawm lo. Lui tê deuh zawk khuahna tur hmun 17 an thlang a, chung zingah Serlui-A (IMW) chu 1988-ah hawn a ni a, Khawiva Project chu kum 1985-ah zawh a ni.

Lalhmangaiha Sailo chuan, rel kawng leh thlawhna ṭumhmun Mi­zoramin a neihte chu PC sorkar laia hmalak ṭan a nih thu te, Railways Minister-in December 12, 1981-ah Bairabi rel kawng bul ṭanna lung­phûm a phûm a, March 6, 1991-ah hawn a nih thu te, thlawhna ṭumhmun atan Kawmzawl ram leh Lengpui ram an thlan thu leh kum 1982-ah Central Aviation Minister tirhin survey neih a nih thute a sawi.

Brig. T Sailo-in Ai­zawla mihring pung zel tur leh tâwt lutuk tur thlir lâwkin, Mizoram sorkar inawpna hmunpui chu Luangmualah bun turin hma a lak thu sawiin Lalhmangaiha chuan, capital project atan hian Central pawhin sum tam tak a pek nghal thu a sawi a, "Sorkar a lo inthlak a, sum tam tak sénga sorkar hmasain ram a lei khawm sate chu mimal hnenah sem ralin, hmalak tawhna chu chhunzawm a ni ta lo a; Aizawla chengte chu khawpui chêp, tâwt leh ṭawp takah kal leh din fàwmin kan inêkbeng ta a ni," a ti.