Kawngpui, boruak leh digital Lamah Mizoram tang se - NITI Aayog VC

NITI Aayog vice chairman Dr Rajiv Kumar leh chief minister Lal Thanhawla chu November 6, Thawhṭanni tlai khan CM banglaah an inkâwm. Dr Rajiv Kumar chuan, Mizoram chu kawngpui, boruak leh digital-ah ṭang se a duh thu a sawi.

Mizorama private investor sàwm luh dan kawng dap leh ngaihtuah chu Mizoram hmasawnna a nih tur thu sawiin Dr Rajiv Kumar chuan, "Mizoram hi inthlunzawmna ṭha - kawngpui, boruak leh digital-ah ṭang a duhawm hle. Japanese leh Malaysian bakah, khawchhak lam rama private investor-te sàwm luh theih ni se. Ei tur sawngbawlna leh khualzin hîp luh kawngah Mizoramin hmabak êng tak a nei a ni," a ti.

NITI Aayog Vice Chairman chuan chief minister Lal Thanhawla chu theihtawp chhuahpui tiamin, Prime Minister-in India hmarchhak bial a ngaih pawimawh thu a hrilh a, "Prime Minister hi mimal tak pawhin India hmarchhak bial hmasawnna ngai pawimawhtu a ni," a ti a; Mizoram chu state dangte nen khaikhinin, mihring tlem zawk leh state tê zawk a nih avangin hmasawn tura puih ṭul bik state a nih thu a sawi.

Mizoramin JICA nen thawhhona ṭha tak an nei chu lawmawm a tih thu sawiin Dr Rajiv Kumar chuan, "Japan organisation tho, JETRO leh JBIG pawh thawhpui se Mizoramin a hlawkpui leh zual ang," a ti a; JETRO leh JBIG nena Mizoram sorkar an thawhho theihna atan kawng dappui a inhuam thu CM Hawla a hrilh.

CM Lal Thanhawla chuan, sorkar laipuia hotu liante'n hmarchhak state an tlawh ngun ta chu thil lawmawm tak a nih thu a sawi a, "Mizoram mipuite'n hun rei tak chhung enhran nia kan inhriatna pawh a reh ṭan a, state hmalakna thuam chak turin sorkar laipuiah state mipuite'n beiseina sang tak an nei mek a ni," a ti.

Lal Thanhawla chuan, Kaladan Multi Modal Transit Transport Project (KMMTP), solar power project, food processing, skill development, entrepreneur development, oil & natural gas zawn leh power project-a hmalaknate a sawi chhuak a; NITI Aayog Vice Chairman chu hmalakpuiah a sáwm a ni.

Mizoram chu kum 20 rambuai vanga mi dangte ûm phâk lo a ni chungin, phûr takin ṭhiante ruala pên turin theihtawp a chhuah tih sawiin CM Hawla chuan, "Mi harsa zawkte chawi kâng turin NLUP kalpui a ni a, NEDP hmangin NLUP hmalaknate chu sawh ngheh tum a ni," a ti.

Chief Minister ṭawiawmtu UDPA minister Zodintluanga rawtna, mobile leh telephone hruipui - optical fibre cable-te electric hruipui banah thlun ve leh lei hnuaia phûm loh rawtna chu rawtna ṭha leh bawhzui nghal chi a nih thu sawiin Dr Rajiv Kumar chuan, "Leimin leh kawng laih chhiat a tihtlem dawn avang leh senso a hautak loh zawk dawn avangin tlang ramah chuan tih vek theih ni se a ṭha ang," a ti a; DO letter a hnena thehluh a ni veleh bawhzui nghal a tiam.

Inkawmnaah hian minister H Rohluna, Lal Thanzara leh KS Thanga te bakah, secretary leh director-te an tel a ni.

NITI Aayog Vice Chairman hian Thawhṭanni vêk khan CMO conference hall-ah Mizoram University, National Institute of Technology, ICFAI University, Pachhunga University College, Zirtiri Residential Science College, Higher & Technical Education department, School Education department, Health & Medical Education department, Women Polytechnic, RIPANS, MIMER leh Centre for Entrepreneurship Development hotute a kâwm.

Zirna-in hrang hrang leh sorkar department aiawhte hian NITI Aayog Vice Chairman leh a thawhpuite hnenah hian chak zawka an institution ṭheuh leh Mizoram state-in hma a sawn theihna tur leh harsatna an neihte an sawi a ni.