Hriselna lama hmasawnna tur sawiho

Lawngtlai DC Dr Arun T hoin nimin khan DC conference hall-ah Health department leh Social Welfare department hotute an ṭhukhawm a; Lawngtlai district chhung khaw tina Village Health, Sanitation and Nutrition Committee (VHSNC) din a, ṭha taka kalpui a nih theih dan tur an rel.

Dr Arun T chuan, hriselna chu mihring nuna thil pawimawh ber a nih thu sawiin, "A enkawltu department mai bakah, mi tinin rilru kan sên a ngai. Khawtlang mipui hrisel nan Health department leh Social Welfare department-te thawhho dan felfai zawk zawn a ngai a, hmasawnna awmze nei zawk a awm theih nan thil pawimawh tak a ni," a ti.

Meeting-ah hian Health department leh Social Welfare department hnuaia Village Health Committee dinna tur dan awm ve ve chu a hranga din loin, Village Health, Sanitation and Nutrition Committee (VHSNC)-ah chhùn fin a, awmze nei zawka hmalak theih dan tur sawiho a ni.

VHSNC-ah hian hmeichhe V/C member kaihhruaina hnuaiah ASHA chu secretary a ni ang a, anganwadi worker leh tlawmngai pawl aiawhte member-ah an awm ang. Thla tin vawi khat tal khawtlang hriselna kawnga hmalak dan tur ngaihtuaha ṭhutkhawm tur a ni a, ASHA leh anganwadi worker-te hna thawh dante an vil ṭhin dawn a ni.