Sorkar hnathawkte Covid-19 dona sum thawhtir hmain inrenchemna kalpui hmasak phût

Zoram Peoples' Movement (ZPM) chuan thuchhuah siamin, Mizoram sor­kar chu sum renchemna tura hmalakna (austerity measure) nei hmasa a nih loh chuan Covid-19 dona atan sorkar hnathawkte hlawh pawt hêk ṭhen lo se an duh thu an tarlang.

ZPM tarlan danin, hripui (Co­vid-19) dona kawngah sorkarin puih a mamawh nia hriain mipuite'n an theihna zâwn ṭheuhah thâ an thawh a, CM Relief Fund-ah mi tam takin sum an thawh bakah, MLA fund pawh MLA pakhat aṭangin Rs. 50,00,000 ṭheuh pawh ṭhen tura rêl mek a ni.

Hripui dona tura mipui pawisa thawh tling khawm chu sorkarin a duh duha a thunun theih loh indepen­dent audit committee-in vil se an duh thu leh, audit committee-ah chuan mi hmingṭha, party hawi zawng nei lote leh audit lama mithiamte tel ngei se an duh thu ZPM chuan an sawi.

Mizoram sorkar sum dinhmun dik tak a puan chian hmaa sorkar hnathawkte hlawh aṭanga pawisa thawhtir tumna chu ennawn ṭul an tih thu sawiin ZPM chuan, "Chief Secretary-in, 'Sum an thawh dante an service record-a chhinchhiah tur a ni,' tia a sawi thu chanchinbua lang hian anmahni phalna rêng ni loa tihluihna, a thawh ve duh lote chunga thiam taka kutthlak tumna a ang. Tihluihnaa an hlawh cut tumna a kâwk a, a ṭha lo hle a ni," an ti.

ZPM chuan, Covid-19 dona atana Mizoramin sum a mamawh dan mumal taka puang turin Mizoram sorkar an phût a, "Sorkar hnathawkte hlawh thawhtir ngaia sum dinhmun a ṭha lo a nih chuan austerity measure ti hmasa phawt se," an ti a; sum tam tak sènna SEDP board 14-a ruling MLA zawng zawng minister rank-a dah a, minister-te hlawh leh dawn angte pek chu ṭul loa sum sènna a nih thu an sawi.