Mizoram sorkarin buhfai chhia hnâwl tawh West Phaileng kudamah dah a tum - MNYF

MNF ṭhalaite chuan November 2, 2017-a Zuang­­tuia Supply kudam an tlawha an thil hmuh dan chu November 6, Thawh­­ṭanni tlai khan bawhzuiin, kudam hi an tlawh leh a; buhfai chhia, ei tlak loh, mipui hnena sem loh tura hnâwl nia an sawi ip eng emaw zat chu West Phaileng kudama dah tura truck-a an hláng lai nangchingin, an hlànthlaktir leh niin an tarlang.

MNYF chuan thu­chhuah siamin, buhfai ṭha lo mipui ei tura sem an tum lui chu Congress sorkarin mipui a zah lohzia leh a pawisak lohzia a tilang chiang tih a tarlang a, "Buhfai ei tlak lohte dah bo loa mipui hnena sem chhuah a awm ṭhin ngei a ni tih finfiahnaah kan ngai. Zuangtui kudama buhfai ṭha lo awm zawng zawng hi tun kar chhung ngeia la bo turin sorkar kan phût nawn a, mipuiin buhfai

ṭha leh ei tlak chauh an dawn theih nan sorkar hmalakna kan thlir zui zel dawn a ni," an ti.

MNF ṭhalaite tarlan danin, MNYF chuan Zuangtui kudama buhfai ṭha lo an dah danah dân kalh a awm ngeiin an ngai a; Warehouse Manual for Operationalizing of Warehousing (Development & Regulation) Act, 2007 (37 - 2007) Chapter XI, Section 3 clause(II) sub-section (d)-ah, bungrua ṭha lote chu dah hrangin, a pangah 'not for issue' tia chhinchhiah vek tur a ni a, mahse, Zuangtui kudama buhfai chhiate chu a ipah 'not for issue' tih ziah a ni lo.

Buhfai intiangte chu chhâwng/thuah 16 aia sanga a ni tur a ni lo, tih a nih laiin, Zuangtui kudama buhfai dahkhawmte chu chhawng/thuah 30 dáwna sangte a nih thu sawiin MNYF chuan, "Sorkar hian dânin a phût ang ngeiin thil ti ṭhin se kan duh hle a ni," an ti.

MNYF chuan, Zuangtui kudamah buhfai ei tlak loh tam tak a awm thu an tarlan chungchangah Congress ṭhalaite'n November 4-ah thuchhuah siam a, buhfai ei tlak loh sem chhuah a nih loh thu te, buhfai ṭha tam tak zingah a chhe lai tlem thlang chhuaka dâwta sorkar tihmualpho tuma MNYF an puhte chu khaw èng zah lohthlak an tih thu an tarlang a; MPYCC chu thuchhuah an neih hmain hre chiang hmasa zel turin an ràwn a ni.