Pawisa tihthih ní Black Day-ah puang

Congress party chuan thuchhuah siamin, BJP kaihhruai National Democratic Alliance (NDA) sorkarin cheng 1,000 leh 500 note a tihthih ni, November 8 chu India ram tan ni lungchhiatthlaka an ngaih thu an tarlang a; November 8 chu Congress party chuan Black Day-ah an puang tih an sawi.

NDA sorkarin November 8, 2016-a cheng 1,000 leh cheng 500 note a tihthih champha, Congress party-in 'Black Day' atana a puang chu Mizoram Pradesh Congress Committee (MPCC) pawhin an thlâwp thu sawiin, MPCC chuan, prime minister Narendra Modi-a’n pawisa tihthih chhan a sawite chu thleng dik a awm lo niin an tarlang.

MPCC chuan, pawisa note tihthih chhan chu - pawisa lem tih reh nan, pawisa a rûka chhêk khâwl (black money) tihreh nan, rawlrála che (terrorist) ṭhinte sum hmuhna tihtawp nan, tihte chu thleng dik a awm lo niin an sawi a, "Pawisa tihthih avangin mi 100 chuangin nunna an chàn phah a, mi sing télin eizawnna an chàn phah a, industry tênau sang tam tak khâr a nih phah bakah, India economy-in nasa takin a chhiatpui zawk a ni," an ti.

Congress party chuan, Central-a BJP sorkar­in nasa takin mipui a nghaisa nia sawiin, "Heti tak maia mipui min dîm lo leh India economy chhiatna tur zawnga min nghaisa hi a thinrim­thlakin a vanduaithlak hle," an ti. Kum 2018-a Mizoram Assembly inthlan turah BJP-in sum leh pai chakna hmangin ṭanhmun sawh ngheh an tum ngei dawn nia sawiin, sum leh pai ît vanga ram chhiatna rap­thlak tak awm thei pumpelh hrâm turin mipui an ngen a ni.