KHAWTHLIR

ILP endik dawn
MZP hruaitute nimin an president L Ramdinliana Renthlei hoa an pisaa ṭhukhawm chuan, Mizoramah dan loa lut leh hnam dang an huangtau sâwt hlea an ngaih thu an tarlang a, "Hnam dang dan loa rawn lut leh phalna tel loa rawn lut, ILP nei mumal lote hi kan hnam leh ram tan thil ṭha lo a ni thei dawn a, Mizoram pumah a rualin MZP dinna hmunah ILP enfiah rûnpui neih ni se," an ti.

DC-in vai liam
Assam Rifles chuan an din champha vawi 183-na pualin October 30, 2017 aṭang khan Sardar Vallabhai Patel Unity & Heritage Motorcycle Expedition an buatsaih a; Exhibition-a tel mi 19-te chu nimin khan Champhai DC Vanlalngaihsaka'n Champhai Darthlalang Tlang aṭangin Myanmar pan turin a vai liam.

NLUP sawiho
NLUP hnuaia hmalaknate tlangzarh tura district leh block level-a Special Campaign kalpui chu nimin khan Aizawl DC Dr A Muthamma hoin DC conference hall-ah sawiho a ni. NLUP line department-te chu Fair-cum-Exhibition neih tur atan inbuatsaih lâwk tura tih an ni a, photo exhibition atan thlalak bakah fair-a beneficiary-te'n an thil thar leh siam chhuahte an pholan theih nan inhmakhua tura hriattir an ni bawk.

Library hawng
BADP sum cheng nuai 10 sênga sak, South Lungdai YMA Rûn cum Library chu nimin khan bialtu MLA Chalrosanga Ralte-in a hawng. Chalrosanga chuan, South Lungdai khawtlangin YMA Rûn cum Library ṭha tak an nei chu a lawmpui thu sawiin, ṭangkai taka hmang turin duhsakna a hlan.

Complex hawng
1st Bn. MAP Complex-a Mini Sports Complex siam thar chu nimin khan DGP Thianghlima Pachuau-in a hawng. Complex-ah hian basketball leh volleyball court a awm a, a siamna atan 1st. Bn. MAP Commandant leh thawktu dangte'n Rs. 80,000 an thawh khawm bakah, Police Headquarters sum Rs. 2,00,000 hman a ni.