Speaker zahawmna hum zo loah puhin MPCC-in báng turin Lalrinliana an phût

Mizoram Pradesh Congress Commitee (MPCC) chuan, Mizoram Legislative Assembly speaker Lalrinliana Sailo chu speaker a nih anga a zahawmna vawng him zo loah an puh a, speaker a nihna aṭanga báng turin an phût.

MPCC chuan thuchhuah an siam­ah, Assembly Speaker chu party ṭan bik nei loa MLA-te ho khawmtu tur, Assembly rorelna kaihruaitu tur, democracy rama chanvo pawimawh ber pakhat a nih thu an sawi a, "Speaker berin a party colour a tihlan nasat chuan ram rorelna a kal dik thei ngai lo. Speaker chu thlei bik nei loa MLA-te rorelna kaihruaitu tur, MLA-te ngaihdan la a, a tam zawk ngaihdana rorelna kalpuitu tur a ni," an ti.

Lalrinliana Sailo chu speaker a nih hnuah party nihna a tihlan nasat avangin ṭum eng emaw zat a zah­awmna a hum zo lo tawh tih sawiin MPCC chuan, "Assembly session-ah opposition party-te nuihza siam nan vawi tam tak a hmang tawh," an ti a, mei nei tak takin vawi tam tak a ṭawng tawh tih an sawi.

MPCC tarlan danin, Speaker kaihhruainaa lirthei lei tur chungchang ngaihtuahnaah Lalduhoma, MLA thusawi chu nasa takin páwn lama politics-a inbeih nan hman a ni tawh. MLA hlawh tihsan chungchang ngaihtuahnaa MLA-te thusawi pawh páwn lama inbeih nan nasa taka hman a ni tawh bawk. Speaker kaihhruaina hnuaia Assembly committee-te chu committee mawngpawp tia hriat a ni tawh.

Tun hnaia Speaker hoa MLA rualte meeting-naah MLA-te thusawi chu an thusawi lai nen a ngial a nganin TV-ah tihlan a ni a; chu chu Assembly committee kalphung a nih loh avangin Speaker berin thil phiarrûk nei sa rànin meeting a ko a, a kaihruai ṭhin a ni tih a chiang hleah MPCC chuan an ngai a ni.

Congress party chuan, media-te hmaah MLA ṭhenkhat zahawmna nasa taka tihmualpho tumin, Mizoram mipui hriat theih turin zahlo takin opposition party-te chungchang speaker Lalrinliana Sailo-in a sawi tih tarlangin, "A chairman-na hnuaia meeting neiha MLA-te'n an ngaihdan an sawite thlengin media hmaah a sawi chhuak a ni. Hei phei chu eng level committee-ah mah chairman-te'n an tih ngai loh a ni," an ti.