Covid-19 - Mizoram dinhmun
May 9, Inrinni khan Falkawn Covid-19 Testing Laboratory-ah mi pahnih, State Referral Hospital-a enkawl lai ve ve chu swab sample endik a ni a, Covid-19 an kai lo ve ve tih hmuh a ni. Nimin Pathianniah erawh chuan sample endik a awm lo.
Kolasib-a chhungkua, an nautê rapid antibody test (RAT) hmanga enfiahnaa rinhlelh kai enkawlte chu hripui an vei loh avangin Inrinni khan chhuahtir an ni a, ni thum hnuah PCR test tih leh tur a ni. RAT hmanga endiknaa rinhlelh (reactive) dang, May 8, Zirtawpni zana SRH-a admit pawh a tûk Inrinniah chhuahtir leh nghal a ni bawk.
Kawnpuia quarantine centre-a khung hran mek pakhat damlo chu RAT-a enfiahnaah reactive a nih avangin May 9, Inrinni tlaiah SRH-ah admit a ni a, vawiinah a swab sample endik a ni ang.
Hetih lai hian, Zoram Medical College-a doctor pakhat leh laboratory technician pahnih chu Viral Research And Diagnostic Laboratory, Silchar Medical College-a RTPCR training turin nimin khan Silchar-ah an kal a ni.