Sorkar office leh board 74 lakah MIC-in complaint 153 dawng tawh

Right to Information Act 2005 hmanga zawhna chhan dan chungchangah Mizoram Information Commission (MIC) chuan sorkar department, board leh office hrang hrang 74 lakah complaint 153 a dawng tawh.

RTI Act hmanga zawhna MIC Depart­mental Appellate Authority (DAA)-in a chhan danin, July 5, 2006 aṭanga Sep­tember 16, 2022 thleng khan MIC hnenah RTI Act hmanga zawhna chháng lo leh chháng ṭha lo sorkar department, board, office 74 lakah zawhna zawttute'n complaint 153 an thehlut tawh a; complaint lutah MIC chuan a ṭul angin hma a la ṭhin.

Mizorama RTI Act hman a nih hnuah Police Headquarters-in zawhna an dawng tam ber a, MPSC-in an dawt. Principal Chief Conservator of Forest office, Land Revenue & Settlement department, PWD, Kolasib DC, School Education department, MBSE, Health Services leh Transport department-te chu zawhna dawng tam zual 10 zingah an tel.

RTI Online hman a nih hnua RTI Act hmanga zawhna luh dan chungchang zawhna chu, 'RTI Online hi July 1, 2022-a hman ṭan chauh a la ni a, MIC chuan sorkar department/office tinte chu RTI zawhna an dawn zat monthly report MIC hnena pe tura hriattir an ni e,' tia chhan a ni.

MIC Annual Report-a a lan danin, kum 2006-07 aṭanga 2020-21 chhung khan RTI Act hmanga zawhna 19,062 a lut a, zawhna chhàn loh leh chhàn ṭhat loh avangin first appeal 190, second appeal 79 leh complaint 141 a lut. Kum 2017-18 kha RTI Act hmanga zawhna a luh tam ber kum niin, zawhna 2,237 a lut a; kum 2013-14 khan complaint/appeal 63 awmin, a tam ber kum a ni bawk.

RTI Act hmanga zawhnate chhan ṭha tâwk awm loa SPIO/ASPIO/DAA-in an dawn duh loh vang te, hun tiam chhunga chhanna pek loh vang te, mimal inhuatna vanga dilna hnâwl vang te, chhanna dik lo leh kimchang lo emaw, mi hruai sual thei emaw pek vang te, dilna tihchhiat vangte leh chhanna pek chhuahnaa harsatna siam vangte, etc. in diltute'n MIC-ah complaint an thehlut thei. Chhanna petu tur SPIO/ASPIO/DAA-te chu hrem an nih chuan pawisa chawitir theih an ni.