Lunglei YMA-in November 5 thleng Kawng siam dan an ngaichâng dawn

YMA Sub-Headquarters, Lunglei hruaitute November 1, 2022 zana ṭhukhawm chuan, Aizawl-Thenzawl-Lunglei (ATL) road siam a nih dan November 5, 2022 thleng ngaihchân an rêl.

Lunglei Sub-Hqrs YMA hruaitute hnen aṭanga Vanglaini thu dawn danin, kawng siamtu Bhavya Company chuan theihtawp chhuaha kawng siam hna thawh an tum thu an sawi avang leh PWD lamin November 5, 2022 thleng ngaichâng leh rih tura an ngen avangin, kawng siam thuai phûtna atan hmalakna an nei leh rih dawn lo.

PWD hotute chuan Bhavya Company hotute chu chak taka hna thawk tur leh November 5, 2022 hmaa hma an lak loh chuan an security deposit cheng nuai 300 hmangin kawng siam a nih tur thu an hrilh.

Lunglei Sub-Hqrs. YMA chuan, kawng siam a nih dan November 5 thleng an ngaichang dawn a, an beisei anga thil a kal loh chuan emergency meeting koin hmalak dan tur an rêl dawn a ni.

ATL kawng siam thuai phût hian Lunglei Sub-Hqrs. YMA hruaitute chuan October 18, 2022 khan Lunglei district pumah No Vehicle Day an kalpui a, chumi hnuah October 31 thleng kawng siam a nih dan ngaihchan an rêl.

October 31 khan kawng siam dan an enfiah a, an duhthusam anga hmalakna an hmuh loh avangin November 1 zan khan hmalak zel dan tur ngaihtuahin an ṭhukhawm leh a, November 5 thleng ngaihchan leh phawt an rél ta a ni.