ILP endik chungchang MZP-in HM an sawipui

MZP hruaitute chuan nimin khan Home minis­ter Lalchamliana chu a pisaah an hmu a, Lengpui Airport leh Mizoram hmun danga inner line permit (ILP) endiknaah Mizoram páwn aṭanga Zo hnahthlak Mizorama rawn lutte ILP endiksak a ni ṭhin chu ṭha lo an tih thu an thlen.

MZP chuan, "Tun hnai­ah kan unau Mizo­ram state ṭhenawm aṭanga lo zinte'n ILP check post-ah tihluihna hmanga ILP check sak leh ILP siam luihtir vanga harsatna tâwk an awm hi hriatthiam har kan ti tak zet a, kan unaute hnam dang ang maia cheibâwla tihluihnaa ILP check sak an ni hi thawktute inthlahdah vangah kan ngai," an ti a; hetiang hi a thlen tawh loh nan hma la turin Home Minister an ngen a ni.

Minister Lalchamliana chuan, hma a lak nghal tur thuin a lo chhang niin MZP thuchhuah chuan a tarlang.