Zangnadawmna pek phût vangin Vairengteah kawng dan a ni dawn

Land Owners' Asso­ciation (Vairengte-Kawnpui Package 3-6 NH 06 & 306) chuan NH kawngpui zauhna atana an ram lakah zangna­dawmna pek thuai an phût a, zangnadawmna pe thuai tura sorkar kar nan tukin zing dar 6 aṭangin Vairengte leh Aizawl inkar kawngpui chu Vairengte dáiah an dang dawn.

Nimin tlai dar 4:30 vela Land Owners' Association hruaitute hnen aṭanga thu dawn danin, sorkar aṭangin thu lawmawm an dawn loh avangin kawngpui dan an tum chu an kaltlangpui dawn. Nimin khan Vairengte khaw mi Land Owners Association-a telte chu an duty-na hmun tur cheibáwlin an hnatlang a ni.

Kawngpui dan tur hi tiamchin awm lo a ni a, vawiinah chuan Vairengte dáiah chauh an duty phawt dawn. Vawiin lamah sorkar aṭangin thu lawmawm an dawng lo a nih chuan Vairengte dái bakah, Rengtekawna Zero Point-ah duty an indah tawh dawn.

Land Owners' Asso­ciation hian October 24, 2022 khan zangna­dawmna pe tura sorkar kar nan Vairengteah kawngpui dan an tum tawh a, Kolasib DC ngenna avangin an ṭhulh. Sorkar hmalakna October 31, 2022 thleng an ngaichâng a, an beisei ang hmalakna a awm loh avangin kawngpui dan an tum ta a ni.

Ram neitu pawlte sawi danin, NH kawngpui zauhna atana ram laka zangnadawmna pek tur chu July 8, 2022 khan zangnadawmna buaipui tura ruat Competent Authority for Land Acqui­sition (Kolasib Additional DC) account-ah thun (transfer) a ni tawh a; an pawlah hian chhungkaw 1,735 an awm a ni.