US zalenna champha lawmnaah tel

Minister Dr R Lalthangliana chuan November 1, Thawhlehni khan United States Independence Day vawi 246-na leh India leh United States ramte'n kum 75 chhung inlaichìnna an neih tawh lawmna, Kolkata-a JW Marriot Hotel-a buatsaihah a tel. Minister chuan, Mizoram aṭanga ṭul bik thila USA-a zin tum, visa diltute ngai pawimawha duhsak ṭhin turin US Consul General a ngen.

Dr R Lalthangliana hi US Consulate, Kolkata-a consul general Melinda Pavek sawmna anga tel a ni. R Lalthangliana chuan, Indo-US inlaichinna chawi nun zel a pawimawh thu te, USA-ah Mizo ṭhahnem takin hna chi hrang hrang an thawh mek thute a sawi a; Mizoram aṭanga ṭul bik thila USA-a zin tum, visa diltute ngai pawimawha duhsak ṭhin turin a ngen a ni.

R Lalthangliana leh Melinda Pavek te hian US leh India ram thawh dunnate leh Mizoram tana hriselna lama hmalakna turte an sawi dun a; hun remchang hmasaah Mizorama rawn zin a tum thu Melinda Pavek chuan a sawi.

Centre for Diseases Control, USAIDS, Consu-late Media depart-ment leh mi pawimawhte R Lal-thangliana chuan kâwmin, Mizoram tana hmachhawp leh thawhho zelna tur thilte a sawipui bawk.

Minister R Lalthang-liana hian Kolkata Mizoram House-a damlote thingpui inna tur leh Calcutta Mizo Welfare Association-in a ṭul apianga an hman turin Rs 10,000 ve ve a pe a ni.