MYC leh HCL Technologies-in Thawh dunna thuthlung an ziak

Mizoram Youth Commission (MYC) leh HCL Technologies chuan nimin khan MYC pisaah thawh dunna thuthlung, Memorandun of Understanding (MoU) an ziak.

Thuthlungah hian MYC aiawhin chairman Dr Vanlalṭanpuia, MLA leh under secretary H Lalnunzuala ten hming an ziak a; HCL Technologies aiawhin vice president Subbaraman B leh general manager Sundar Raman S ten hming an ziak a ni.

MoU angin, Mizo ṭhalai, pawl 12 Science pass, Mathematics subject-a 60% hmu chin tan HCL Technologies-in TechBee programe hnuaiah exam an buatsaihsak dawn a, exam-a tlingte chu HCL Technologies-in an chhawr chhunzawm ang.

HCL-a an luh aṭanga kum khat chhung training pek an ni ang a, chumi chhunga an senso atan a tling hmasa mi 50 hnenah MYC-in Rs 50,000 ṭheuh a tumsak dawn a ni.