Keilungliah tuikhuah chungchang sawiho

Champhai District Committee on Post Completion Management & Maintenance of Dam Reservoir cum Recreation Centre at Keilungliah chu nimin khan an chairman James Lalrinchhana, bawrhsap hoin DC conference hall-ah an ṭhukhawm a; Keilungliah tuikhuah chungchanga rawtna sorkara thlen turte an sawiho.

Ṭhutkhawma tarlan danin, Keilungliah luiah watch tower - pentagon glass house leh valve chamber siam mek a ni a, tuna hmalakna tur hmachhawp awmte chu November 2022 chhunga zawh vek hman beisei a ni. A tìra expenditure sanction aia senso a tam belhna leh hmalak ṭul angte bawhzui nan revise estimate cheng vbc 3.897 siam a ni a, thehluh a ni tawh.

Meeting-ah hian, Keilungliah tuikhuah cheibâwlna atana UDPA department aṭanga hmalakna tur sum nuai 51 beisei chungchang leh hmanna tura rawtna awmte sawiho a ni a; rawtnate chu sorkarah thlen ni se, an ti.