Mamit district registration motor-te Champhai dist-ah bungrua phurh phal lo; Mamit district-ah inenhranna a awm lo

October 30, 2022-a Mamit district chhunga kuhva rah phurtu lirthei pathum a kan avangin Champhai District Lirthei Inzawmkhawm Pawl (CDLIP) chuan Mamit district-a lirthei ziah luh (registration nei)-te Champhai district chhungah bungraw phurh luh leh phurh chhuah an phal lo.

Myanmar lam aṭanga dan loa kuhva lâk luh nia hriat phurtu lirthei pathum October 30, Pathiannia Mamit district chhung, Dárlâk leh Tuidam inkara a kâng chu Champhai DLIP chuan an dem thu sawiin, lirthei hâl tuma beitu misualte man chhuak a, hrem ngei turin Mizoram sorkar an phût a ni.

CDLIP hruaitute October 31, 2022-a ṭhukhawm chuan, lirthei hâlnaa inhnamhnawite an phu tâwka hrem an nih hma chuan Mamit district-a lirthei register-te chu Champhai district chhungah bungraw phur lut/chhuak lo turin an hriattir bawk.

Hetih lai hian, All Mamit District Vehicle Owner Association chuan nimin khan thuchhuah siamin, Champhai District Lirthei Inzawmkhawm Pawl-in Mamit district-a registration nei lirtheite Champhai district-a bungrua phurh luh/chhuah an remti lo chu pawi an tih thu an tarlang a, "An thu hi sût leh hram turin kan ngen tak meuh a ni," an ti.

Mamit district-a lirthei neitu inzawmkhawmte chuan, "Mamit district chhungah hian motor registration avanga inenhranna a awm ngai dawn lo a, khawi district-a mi pawh ni se, thlamuang taka tlân vek turin duhsakna kan hlàn," an ti a; chutih rualin, dan phal loh thil phur lo turin lirthei neitu leh khalhtu zawng zawng an ngen nghal bawk.