MNF-a rinna nghattu an pung zel - MNF Ṭhalai

MNF ṭhalaite chuan, hmun hrang hrangah MNF sorkara rinna nghattu mipui an pung zel nia sawiin, "Kum 2023 Mizoram inthlanpui awm turah pawh Pu Zoramthanga kaihhruai MNF-in sorkarna ngêlnghet zawk nen rorelna a chang leh ngei dawn tih a lang chiang hleah kan ngai," an ti.

MNYF thuchhuah chuan, mipuiin MNF sorkarah rinna an nghah zel avangin khawpui chhungah nasa takin hma an sâwn nia tarlangin, "October thla chhung ringawtah pawh mi thar 1,500 chuangin MNF an zawm belh a ni," a ti a; Aizawla local council 85 awmawh MNF-in LC 76-ah rorelna an chang mek tih a tarlang.

Congress leh ZPM chu innghahna tlak an ni lo nia sawiin MNYF chuan, "Aizawlah Congress party leh ZPM dinhmun nasa takin a tlahniam mek. Aizawl khawpuia MLA bial 11 awmah Congress party chuan MLA pakhat pawh nei loin an artelukàwn hial a ni," an ti bawk.