Kuhvaa harsatna chingfel vat turin MPCC-in Mizoram sorkar an phût

Mizoram Pradesh Congress Committee chuan thuchhuah siamin, kuhva chungchanga Mizoram harsatnate a rang thei ang bera chingfel turin Mizoram sorkar an phût a; Mizorama thar kuhva phurhna kawngah harsatna siam tawh lo turin Assam sorkar an phût bawk.

MPCC chuan, kuhva tawlh rûk a tam vang nia ngaih theiha Mizoram khaw thlang lama mite'n kuhva an tharte an hralh thei lo leh chumi vanga harsatna hrang hrang thleng a, Mizo leh Mizo inkara inepna hial a thleng chu pawi an tih tak zet thu an sawi a, "Heng hi Mizoram sorkar chak loh vang te, ram hruaitu lu ṭhenkhatte leh kuhva tawlh rûknaa inhnamhnawih, Assam sorkar wanted-te nen pawha inzawmna ṭha tak an neihin a hrin chhuah a ni," an ti.

Ram páwn aṭanga kuhva rah lak luh leh phurh kual chu dan anga kalpui theih reng a ni tih sawiin MPCC chuan, "Dan hnuai kalpui a nih theih nan sorkarin a duh chuan hma a la thei reng a ni," an ti a; dan hnuaia kalpui tura hmalakna awm lo leh harsatna thleng pawh chinfel tuma hmalakna awm si lo chu an hrethiam thei lo tih an sawi.

Congress party chuan, MNF sorkarin awmze neia hma a lak theih loh avangin Assam lamin an state chinah harsatna an siam tih sawiin, "Mizorama thar ngei kuhvate pawh tawlh rûk thila ngaiin an kaltlangtir phal ta lo. Hei vang hian Mizoram chhung ngeia kuhva chíngtuten harsatna an tâwk a, an kuhva tharte an hralh thei lo a, kuhva phurtu motor neitute nen an inkarah inepna hial a thleng ta a ni," an ti.

Kuhva chungchanga thil awm dan chuan MNF party chu rorel zel tlak an ni lo tih a tilang nia sawiin MPCC chuan, "Dan leh thupek kenkawhna kawngah an hlawhchham a ni tih a tichiang hle. Loneitute tawrhnain a koh êih zawh loh sorkar kan nei hi a vanduaithlak tak zet," an ti a; sorkar ṭha chuan a mipuite harsatna a chinfelsak tur a nih thu an tarlang bawk.