Thlai hralhnaa harsatna sukiang turin ZPM PAC-in Mizoram sorkar an phût

ZPM party chuan, Mizorama thlai thar hralhna kawnga harsatna thleng mekte chu a rang lama sukiang tur leh hma la thuai turin Mizoram sorkar an phût.

ZPM Political Affairs Committee nimina ṭhukhawm chuan thuchhuah siamin, Mizorama kut hnathawktute thar dehralnaah hun rei tak aṭangin harsatna an tâwk nasa tih an tarlang a, "Hei hi ZPM chuan kan ngai pawimawh a, kut hnathawktute tan theihtawp chhuaha an harsatna sutkian a nih theih nan hmalak zel ṭha kan ti. Thlai thar hralhna kawnga harsatna tawh mekte a rang lama sukiang tur leh hma la thuai turin Mizoram sorkar kan phût," an ti.

Assam sorkarin harsatna a siam ṭhin sutkianna tur záwnga state pahnihte inbiakna kal lai hmachhawp a awm chungin, inbiaknaa tel tur Revenue Minister leh Law & Judicial Minister te ram danga an zin khawthawn avanga inbiak hun sawn rawt a ni chuan kut hnathawktute harsatna Mizoram sorkarin a ngaih pawimawh tâwk lohzia a tichianga an ngaih thu an tarlang bawk.