KHAWTHLIR
Party mite tlawh
Congress Ṭhalai president Dr Lalmalsawma Nghaka leh hruaitu dangte chuan Aizawla local council tina Congress party unit-te tlawh chhuah hun an hman mekah November 1, Thawhlehni zan khan Maubawka an party mite an tlawh. Dr Lalmalsawma chuan, "Ṭhalai mahni inringtâwk, mahni kea dinga intodelhtir hi kan ngaih pawimawh leh tum ber a ni," a ti.
Meizial man
Assam Rifles leh Champhaia Custom Preventive Force mite chuan nimin khan Champhai Zotlangah ram dang meizial báwmpui 190 an man a, dan anga hmalak zui turin Customs department-in an hréng. Foreign cigarrette an man hi Rs 2,47,00,000 man a ni.
MLA-in bungrua pe
Aizawl West-III bialtu MLA VL Zaithanzama chuan November 1, Thawhlehni khan a bial chhunga health centre leh sorkar sikul ṭhenkhat hnenah an mamawh bungrua - refrigerator, tuizem leh water filter eng emaw zat a hlân. Bungraw inhlanna hi a chenna inah buatsaih a ni.
Sa pêl khap
Aizawl district magistrate Dr Lalhriatzuali Ralte chuan, Aizawl district-ah air gun/air rifles leh silai enlenna vuah hmanga nungcha pêl leh sa kah khap a nih thu a puang. Thupek bawhchhiate chu kum 3-7 chhung tàntir leh Rs 25,000 chawitir theih a ni.
Kawng khâr dawn
PWD-in vawiin aṭanga November 16, 2022 thleng zing dar 9:30 leh tlai dar 4 inkarah Ramthar Veng Sihpui pengṭhuam aṭanga Electric Veng/Ramthar Veng thlanmual inkar kawng thawm ṭhat hna an thawk dawn. Hna thawh chhungin kawngpui khar a ni ang.
NEP inhrilhfiah
Samagra Shiksha State Project Office chuan nimin khan Administrative Training Institute-ah National Education Policy 2020 tihhlawhtlinna tur 'National Initiative for Proficiency in Reading with Understanding and Numeracy Bharat' chungchang inhrilhfiahna an buatsaih.
Bawng certificate
Serchhip additional DC Lalmuansanga Ralte chuan, Serchhip district-a bawng la lut tur tan Veterinary Soundness Certificate neih a ngai tih a a tarlang. Certificate nei lo bawng phur/kài man an nih chuan dan anga hrem an nih tur thu a tarlang bawk.
Flower Show
Horticulture department chuan nimin khan Lunglei Convention Centre tualah Flower Show an buatsaih a, Horticulture director Dr Elizabeth Saipari'n a hawng. Show-ah hian mi 59 an tel a, dawr 20 hawn niin pangpar 101 pho a ni a, vawiin leh naktukah chhunzawm a ni ang.