Thiamna leh theihna ram hmasawnna atana hmang turin President-in zirlaite a chah

President Droupadi Murmu chu Mizorama zan khat riak turin nimin khan a rawn thleng a, nimin chawhnu khan Mizoram University Convocation vawi 17-na a hmanpui a; zirlaite chu an thiamna leh theihnate khawtlang leh ram hmasawnna atan hmang turin a chah.

MZU visitor ni bawk Droupadi Murmu hi MZU Convocation-ah khuallian a ni a, Governor Hari Babu Kambhampati, MZU chief rector ni bawk leh chief minister Zoramthanga te khualzahawm an ni.

Convocation-ah hian vice chancellor Prof. KRS Sambasiva Rao-a'n inlawmna thu a sawi a; zirlai hlawhtlingte hnenah degree, gold medal leh prize-te hlan a ni. Gold medal dawngtute hnenah President-in medal leh thuziak a hlan.

President chuan, zirlai hlawhtling tharte a lawmpui thu sawiin, zirlai zinga an subject bika gold medalist ni theite leh Book Prize dawngtute chu chhuanawm a tih thu a sawi a; an thiamna leh theihnate khawtlang leh ram hmasawnna atan hmang turin a chah a ni.

NIRF-in India rama university ṭha zual 100 a thlan zingah MZU-in ranking sang tak a nei chu ropui a tih thu sawiin Droupadi Murmu chuan, "University naupang tak ni mah se, thawktute inpekna azarah kawng engkimah MZU-in hma a sawn tih a chiang. University ṭha tehnaah sang zual zel turin theihna a nei a ni," a ti.

President chuan, MZU hmuhma chu ṭha a tih thu sawiin, "Campus chhunga hmalakna hi eco-friendly/ environment friendly ni zel se duhthusam a ni," a ti a; research lamah hmasawn zel tuma theihtawp a chhuah leh technical education leh skill development lamah ṭan a la zel chu ṭha a tih thu a sawi bawk.

Convocation-ah hian mi 38 hnenah doctor of philosophy, mi paruk hnenah master of philosophy, mi 469 hnenah master degree, professional course hrang hrangah master degree 103, bachelor degree 109, professional course hrang hrangah bachelor degree 107 hlan a ni a; an vaiin mi 832 an ni. A hmuna kal lo degree dawng mi 5,994 an awm bawk a; tun ṭum convocation-a degree dawngtu zawng zawng chu mi 6,826 an ni.

Zirlai hlawhtling degree nei thar zingah gold medalist 52 leh Book Prize winner mi 16 an awm bawk.

MZU Convocation-ah hian Mizoram Assembly speaker Lalrinliana Sailo, minister panga - Dr R Lalthangliana, C Lalrinsanga, Lalchhandama Ralte, Dr K Beichhua leh Robert Romawia Royte te bakah, MLA dangte pawh an tel a ni.