Deputy Chief Minister hlui Lalhmingthanga vui liam a ni

Mizoram deputy chief minister hlui Lalhmingthanga (82) h/o Roṭhuami, Khatla chu Nilaini zan zanlai pelh hnu, November 3, 2022 dar 12:40 khan a thi a, nimin khan an inah vui a ni.

June 9, 1940-a piang Lalhmingthanga hi thiamna lamah BA a ni. Assam Civil Secretariat-ah LDC leh Mizo Modern H/S, Nongrim, Shillong-ah headmaster a ni tawh a, Mizoramah supplier leh contractor a ni tawh.

Lalhmingthanga hi kum 1978-a Assembly inthlanpuiah PC ticket-in Lunglei bialah thlan tlin a ni a, Brig. T Sailo kaihhruai PC sorkarah 1984 thleng cabinet minister niin, Finance, PWD, Land revenue & Settlement, Excise & Taxation department-te a enkawl.

Kum 1984-ah Lunglei bial leh kum 1993-ah Congress leh PC party thawh dunnain Aizawl North-I bial aṭangin MLA atan thlan tlin a ni a, kum 1993 hian cabinet minister niin, Finance, PHE leh SAD-te a enkawl. Kum 1998 khan Aizawl East-I bial aṭangin a ṭum ngana atan MLA atan thlan leh a ni a, hemi ṭum hi MNF nena thawk dunin sorkar inṭâwm an siam a, deputy chief minister a ni a, term a hmang tluan lo thung. Kum 2003 inthlanpuiah Lunglei South bial aṭangin MPC ticket-in thlan tin leh a ni.

Lalhmingthanga hi khawtlang leh kohhranah hruaitu a ni a, kum 1989 khan Aizawlah Baptist kohhran upa atan thlan a ni. Lengzem hla lâr 'Kár a hlá' tih phuahtu a ni a, Pathian hla lâr 'Lal Isua hnenah' (I must tell Jesus) tih letlingtu a ni bawk.