Vairengte dáiah kawngpui dan a ni ; Vawiinah dan chhunzawm an tum

Land Owners' Association (Vairengte-Kawnpui Package 3-6 NH 06 & 306) chuan, national highway kawngpui zauhna atana an ram lakah zangnadawmna pe thuai tura Mizoram sorkar karna atan, nimin zing dar 6 aṭang khan Vairengte dáiah Vairengte leh Aizawl inkar kawngpui an dang ṭan.

Land Owners' Association hruaitute hnen aṭanga nimin tlaia Vanglaini thu dawn danin, nimin lamah sorkar aṭangin thu dawn an nei lo. Kawngpui an danna hmunah magistrate-in tlawh ṭhin mah se, an beisei leh duh ang thu ken a nei lo. Kawngpui an dan hi tiam chin awm lo a ni a, zana riak tur an inruat a ni.

Vairengte aṭanga thu dawn danin, kawng dangtute hnawt darh turin sorkarin hma a la lo a; kawng dan tur an hriat lâwk avangin ni tin mamawh phur lirtheite Assam aṭangin Mizorama luh tumin an rawn tlân lo. Hetih lai hian, zin veivak ṭhenkhat dan an awm a, eng emaw harsatna avanga kaltlang dilte chu kaltlangtir an ni.

Tarlan tawh ṭhin angin, Land Owners' Association hian October 24, 2022 khan zangnadawmna pe tura sorkar kar nan Vairengteah kawngpui dan an tum tawh a, Kolasib DC ngenna avangin an ṭhulh. Sorkar hmalakna October 31, 2022 thleng an ngaichâng a, an beisei ang hmalakna a awm loh avangin kawngpui dan an rel nawn leh a ni.

Ram neitu pawlte sawi danin, NH kawngpui zauhna atana ram laka zangnadawmna pek tur chu July 8, 2022 khan zangnadawmna buaipui tura ruat Competent Authority for Land Acquisition (Kolasib Additional DC) account-ah thun (transfer) a ni tawh a; an pawlah hian chhungkaw 1,735 an awm a ni.

KAWNGPUI DAN DINHMUN
• State páwn aṭanga lirthei Mizorama lut tur zawng zawng dan a ni.
• Mizoram chhung bika che vêl khualzin phur lirtheite chu dan a ni lo a, state pawna tlânte erawh dan a ni.
• Mizoram aṭanga chhuak tur lirtheite dan a ni lo.
• Harsatna bik thil - dam lohna, thihna, adt. vanga tlan ngaite chu ngaihhnathiam an ni.