Kumin January-October chhungin Dengue vei mi 437, mi 2 thi tawh

State Vector Borne Disease Control Programme chuan, thosi chi khat, Aedes aegypti seh aṭanga kai theih dengue laka mipui an him theih nan thosi pian theihna tui tling tibo a, thosi huat hnawih chi leh hâl chite hmang ṭhin turin mipui an chah. Kumin January-October chhungin dengue vei mi 437 hmuh a ni tawh a, mi pahnihin an thihpui tawh tih an tarlang bawk.

SVBDCP chuan nimin khan thuchhuah siamin, dengue chu khawvela natna hluar chak ber zinga mi a nih thu an tarlang a, "Mizoramah pawh tun hnaiah dengue vei an pung chho a, Aizawl leh Lunglei district-ah a hluar bik. Mizoramah chuan malaria angin kan la hre bel lutuk lo a, natna pung chak tak a nih avangin invên kawngah ṭan kan lak reng loh chuan malaria tluk zeta buaipuiawm a nih a hlauhawm hle," an ti.

Dengue natna hrik (virus) chu khaw ên laia mi seh ṭhin thosi chi khat, Aedes aegypti (a dum leh vara ṭial)-in a pu darh a, a seh apiangin dengue an vei ṭhin tih tarlangin SVBDCP chuan, "Mizoramah dengue thlentu thosi a tam hle a, chhun khaw ên lai leh ruahsur zawhah a pung ṭhin. Dengue hrik pâi Aedes thosiin mi a seh aṭanga ni 5-6 chhungin dengue natna a lo lang chhuak ṭhin," an ti a; enkawl vat a nih loh chuan thihpui theih a nih thu an sawi.

SVBDCP chuan, dengue leh thosiin a thlen theih natna dangte laka invênna atan - in leh a vêla tui tlin theihna tifai tur te, tuizem/tui dah khawlna phui taka chhìn tur te, Aedes thosiin khaw ên laiin mi an seh tlangpui avangin chhunah pawh naupang an mutin thosi lên zàr tur te, kawr bán tlâwn/kekawr tlâwn ha ṭhin tur te, thosi huat - Odomos, Allout leh a dangte hmang ṭhin tur te, in chhunga thosi luh loh nan tukverhah lên zar turtein mipui an chah a ni.