HIV/AIDS tamna ber leh cancer hluarna ber kan ni hi a pawi - Dr Thangtea

Health minister Dr R Lalthangliana chuan, mihring cheng zat aṭanga chhûtin Mizoram chu HIV/AIDS tamna ber leh cancer hluarna ber a ni chu pawi a tih thu sawiin, inenfiaha ṭan lak a ngaih tak zet thu a sawi.

Dr R Lalthangliana hian November 2, Nilaini zan khan Rimawi Khawvel Music Award semna a hmanpuinaah thu sawiin, "India ramah Covid do leh thil tam takah kan hmingṭhat hle laiin, HIV/AIDS tamna ber leh cancer hluarna ram kan ni hi a pawi hle. Kan inenfiaha ṭan kan lâk a ngai tak zet a ni," a ti.

Mizote chu zai leh rimawiah an duai lo tih a sawi rualin R Lalthangliana chuan, "Music a ni emaw, zai lam a ni emaw, sport-ah pawh ni se, Mizote kan daih rei lo ṭhin a, a pawi tak zet," a ti a; zai lama hranghlui, daih rei takteah ṭhangthar zawkte'n entawn tur tam tak an neih thu a sawi.

Dr R Lalthangliana chuan, ṭhangthar zaithiam, theihna ṭha tak tak neite chu daih rei tum tura chahin, "Zûk leh hmuan, ruihtheihthilah fihlim ang che u," a ti a; mi dangte tan entawn tlak nih tum turin a chah bawk.