Minister-in hall zauh tur a enfiah

Minister of state Robert Romawia Royte chuan nimin khan a bial, Aizawl East-II chhunga Armed Veng South community hall zauhna tur hmunhma sorkar hotute leh khawtlang hruaitute nen an enfiah a; uluk leh chak taka hna thawk turin contractor-te a hrilh.

Armed Veng South community hall hi a dung leh vang ft. 15-a zauh a, a chung tihsan tum a ni a, cheng nuai 200 ruahman a ni. Police ram nen insiamrem a ngaih avangin Home Secretary leh hotu dangte nen an enho a, tender hmanga hna thawk tura thlan Excel Construction-in hna an thawh ṭan nghal theih turin an insiamrem a ni. Hall zauhna tur bula Police quarters pakhat sak ṭhat ngai chu Sports department-in an sak ṭhatsak ang.

Robert Romawia chuan, Chief Minister, Home Minister leh Home department chungah phal taka an ram an sahthlak avangin lawmthu a sawi a, "Local council leh YMA-te'n neitu rilru puin hnathawktute enpui ṭhin ang che u," a ti.

Hmunhma enfiahnaah hian Home secretary H Lalengmawia bakah, Home department leh Police hotu te, Mizoram State Sports Council hotute leh Armed Veng South khawtlang hruaitute an tel a ni.