President-in zirna-in/hostel panga a hawng

President Droupadi Murmu chuan nimin khan Mizoram University hnuaia hmun hrang hranga in sak thar pali leh Indian Institute of Mass Communication regional campus a hawng.

President-in MZU-a in sak thar a hawnte chu - Mualpuia Government Aizawl College administrative building leh academic building te, Pachhunga University College-a academic block te, MZU-a Tribal Girl Students’ Hostel leh Sairanga Rural Tribal Girls’ Hostel-te a ni a; cheng vbc. 25 sénga MZU campus-a sak IIMC, North Eastern Regional Campus building a hawng bawk.

Droupadi Murmu chuan, in sak tharte chu Mizorama zirna atan hmasawnna lian a tlin thu sawiin, "IIMC phei chu India rama journalism zirna ṭha berin hmarchhak biala campus a rawn siam belh a ni a, hmarchhak biala media leh journalism tan hmasawnna a rawn thlen dawn a ni," a ti.

Govt Aizawl College sak nan DoNER aṭanga hmuh cheng vbc. 12 hman a ni a, kum 2017-ah sak ṭan niin, kum 2021-ah sak zawh a ni. PUC-a academic block sak nan NEC/DoNER aṭangin nuai 456.64 hmuh a ni a, Tribal Girl Students’ Hostel sak nan Ministry of Tribal Affairs aṭangin nuai 350 hmuh niin, October 1, 2020-a sak ṭan, October 30, 2022-a sak zawh a ni. Rural Tribal Girls’ Hostel, Sairang sak nan Tribal Affairs aṭangin cheng nuai 350 hmuh a ni bawk.

President Droupadi Murmu hi nimin chawhnu dar 1:47 khan Lengpui Airport-ah a rawn thleng a; Governor Hari Babu Kambhampati, chief minister Zoramthanga leh sorkar hotu dangte'n an lo hmuak a, helicopter-in MZU a pan nghal.

Vawiinah Mizoram Legislative Assembly special session-ah thu a sawi ang a, chawhnuah Mizoram a chhuahsan ang.