MPYCC-in social media training an nei

Mizoram Pradesh Youth Congress Committee (MPYCC) chuan nimin khan Congress Bhavan-ah Social Media Training an buatsaih a, Congress party thu leh hla puanzar kawnga fimkhurna tur leh ṭhahnemngaihna turte an sawiho.

MPYCC president Dr Lalmalsawma Nghaka chuan thu sawiin, thu dik leh rintlak chauh sawi ṭhin turin Congress ṭhalaite a chah a; thu dik post turin fake account neih a ngaih loh thu leh tute party emaw worker ṭhahnemngaite'n Facebook, Instagram, Twitter, Whatsapp-ahte fake account nena mi an bei vak vak ṭhin chu ṭha lo a tih thu a sawi.

Dr Lalmalsawma chuan, Congress party-in sorkar ngawr ngawr an tum lo a, sorkar ṭha siam an tum tih sawiin, "Kan tum dan leh kan manifesto-te hi mipuite'n chiang taka an hriat theih nan theihtawp chhuaha social media hmanga puanzar hi Congress ṭhalaite mawhphurhna a ni. Amaherawhchu, social media-a thu kan post rêng rêngin ṭawngkam dik leh hawihhâwm tak kan hman ṭhin a pawimawh," a ti.