MP Rosanga'n Union Minister a kâwm

Lok Sabha MP C Lalrosanga chuan nimin khan sorkar laipuia Education leh Ministry of External Affairs changtu minister of state Rajkumar Ranjan Singh chu New Delhi-ah a kâwm a; Mizoram leh Manipur-ah Myanmar aṭangin bungrua tawlh luh mek a nih thu a hrilh.

Sorkar thuchhuah tarlan danin, C Lalrosanga chuan, dan kalha kuhva leh bungraw ṭhenkhat tawlh rûk ṭhin chu sorkarin a ngaimawh nia sawiin, "Hemi chungchang hi a hrana ngaihtuah zui ni se," a ti.

Myanmar râltlânte Mizorama chhawmdawl dan te, Kaladan Multi Modal Transit Transport Project kawng chungchang te, Mizoram district hrang hranga Kendriya Vidyalaya leh Jawahar Navodaya Vidyalaya din a ṭul thute MP chuan a sawi a; Rajkumar Ranjan Singh chuan, rawtna fel tak thehluh a ngaih thu a lo hrilh.

MP C Lalrosanga leh Rajkumar Ranjan Singh hian nimin vêk khan New Delhi-ah Consortium for Global Education, United States hotute an hmu a; India leh US inkarah zirna lama thawhhona zau zawk a awm theih dan tur an sawipui a ni.