Pol party-te'n Lalhmingthanga an ui

Political party ṭhenkhat - MNF, PC leh BJP-te chuan nimina vui liam tâk minister hlui Lalhmingthanga an sûn thu leh an ui thu, thuchhuah siamin an tarlang.

MNF chuan, an party-a adviser ni mek Lalhmingthanga chu thinlung taka an sûn thu tarlangin, "A kalsan a nupui fanau, tu leh fa, a chhungte zawng zawng Pathianin thlamuanin awmpui zel se kan duh tak meuh. MNF party tana a thawhrimna te, Mizoram leh hnam tana theihtawp a chhuah tawhnate kan chhuangin kan theihnghilh ngai dawn lo a ni," an ti.

PC party chuan, "PC party-a consultant ni mek Pu Lalhmingthanga, ex-deputy chief minister-in chatuan ram min pansan ta mai hi kan uiin kan sûn tak zet," an ti a; PC party leh ram tana a finna, thiamna leh theihna a hlannate chu an hriat reng dawn thu an tarlang.

BJP, Mizoram Pradesh pawhin, Lalhmingthanga chu an ui thu sawiin, "Mizoram tan hetiang mi bîk kan chán hi chànna nasa tak a ni. Mizoram tan rawng a bàwlnate hriat reng a ni tawh dawn a ni," an ti.