KHAWTHLIR

Thisen pe
KṬP, Bethlehem Venglai North Branch chuan an branch din champha pualin nimin khan Synod Hospital tan thisen unit 25 an pe a, petute mipa 21 leh hmeichhia pali an ni.

Heroin man
Mizoram Police-a Serchhip District Special Branch chuan November 1, 2022 zan khan heroin gram 109.44 leh a neitua puh C Hmingthangi leh Hmangaihzuali, Serchhip ve ve an man. Heroin hi international market-ah cheng nuai 54 hû a ni a, Serchhip Police Station-ah thubuai ziah luh a ni.

Jubilee hmanpui
Lengteng bialtu MLA L Thangmawia chuan nimin khan a biala Kawlkulh Branch YMA Diamond Jubilee lawmna a hmanpui. MLA chuan, MLA a nih kum li chhungin Covid hripui avangin hna thawhna hun kum khat âwrh chauh a awm thu sawiin, bial mipui beisei a phak lohnaah ngaihdam a dil a ni.

BLO tan training
Lunglei district election officer Kulothungan A, bawrhsap hoin nimin khan Lunglei Convention Centre-ah booth level officer 121-te tan Special Summary Revision 2023 training buatsaih a ni. Special Summary Revision 2023 atana draft roll chu November 11, 2022-ah tlangzarh tur a nih thu leh final roll chu January 15, 2023-ah tlangzarh tur a nih thu tarlan a ni.

Thupui sawiho
Indian Institute of Technology (IIT), Madras Alumni member pasarih chuan nimin khan sàwm an nih angin National Institute of Technology (NIT), Mizoram an tlawh a, zirlaite nen thupui hrang hrang an sawiho. An sawiho zingah thlipui (cyclone) leh chhiatna hmachhawn dante a tel.

Meizial man
Assam Rifles sipaite leh Champhaia Custom Preventive Force mite ṭangho chuan nimin khan Champhai Ruantlangah ram dang meizial báwmpui 420 an man. Foreign cigarrette mante hi Rs 5,46,00,000 man a ni a, Customs department-in an hréng zui a ni.

Zoram Harh Rawh
Aizawl district additional DC C Laltleipuii kaihhruaiin nimin khan Aizawl SP conference hall-ah Aizawl District Zoram Harh Rawh Campaign Organising Committee an ṭhukhawm a, Aizawl district-a YMA branch-te hnam làm leh zai hmanga intihsiakna buatsaih dan tur an rêl a ni.