BJP-in Anti Black Money Day an hmang

BJP, Mizoram Pradesh chuan nimin khan Aizawl leh district khawpui dang ṭhenkhatah Anti Black Money Day an hmang.

Mizoram BJP president Prof JV Hluna chuan, sum thianghlim lo (black money) neite bank account nuai 17.73 man chhuah a ni a, chu'ng bank account-ah chuan cheng vbc. 3,68,000 vel a awm niin a sawi.

Prof JV Hluna chuan, sorkar laipuia Congress sorkarah corrup­tion a hluar a, mualphona lianpui pui a awm chungin an intham lungawi zel nia sawiin, chu'ng avang chuan mi hausate'n chhiah awl nan pawisa note lian 500 leh 1,000 tam tak an chheprelh a, mi firfiak leh helte'n an duh tawkin sum an neih theih phah niin a sawi a ni.

JV Hluna chuan, May 26, 2014-a BJP sorkar a pian aṭangin black money, corruption leh terrorism-te tihbo tum a ni a, black money dapchhuaha tihbo dan zawng turin Special Investization Team din nghal a nih thu a sawi a, "Eirûk chîng leh sum thianghlim lo la lutte'n chhiah âwl nana pawisa an chhehrelh tam ber, cheng 500 leh 1,000 note chu November 8, 2016 zanlaiah tihthih (demonetised) thut a ni ta a ni," a ti.

Pawisa tihthih a nih hnuah sum thianghlim lo leh chhehrelh eng emaw zat man chhuah a nia sawiin JV Hluna chuan, "An chhiah pekna PAN card (Permanent Account Number) nena inmil lo rinhlelh account nuai 17.73 man chhuah a ni a, chutianga sum awm chu cheng vbc. 3,68,000 a ni," a ti.

Mizoram BJP President sawi danin, demonetisation vangin India ramah mi dang hminga account hawng nuai 23.22 hmuh chhuah a ni a, bank-a dah luh loh cheng nuai 16,000 a awm. Sum hmuhna hriat loh vbc. 29,213 dap chhuah a ni a, India mi 0.00011%-in India pawisa fai 33% an kawl tih hmuh chhuah a ni bawk.

JV Hluna chuan, demoneti­sation vangin mi firfiak leh hel pawlte'n bank account an nei thei tawh lo nia sawiin, "Kashmir leh India ram hmun hrang hranga terrorist leh Naxalite ten bank account an nei ve thei ta lo a, an sum fai kawl a thi bawk si a, chêt lâk harsa an ti a, police leh security force hnenah an inpe ta vak vak mai a ni," a ti.

BJP President chuan demo­netisation hi Mizoram chief minister Lal Thanhawla leh Finance minister Lalsawta te pawhin Congress Bahvan-a political session a an thusawiah an fak thu a sawi.