Congress party-in Black Day an hmang

Prime minister Na­rendra Modi kaihhruai sorkar laipuiin cheng 1,000 leh 500 note a tihthih ní, November 8, 2016 chu Congress party chuan Black Day-ah an puang a; Black Day champha hmasa ber, nimin khan Congress party chuan India ram hmun hrang hrangah Black Day pualin hun an hmang a, Aizawlah pawh Congress Bhavan-ah hman a ni.

Black Day puala in­khawm hi MPCC general secretary C Chawng­kunga'n a kaihruai a; minister Lal Thanzara'n thu sawiin, prime minister hlui Manmohan Singh chuan cheng 1,000 leh 500 note tihthih (demonetisation) chu 'Mi tlemtêin mi tam tak an rawkna' tia a sawi thu a sawi a, "Ani ang tho hian khawvel economist hmingthangte pawhin demonetisation hi ṭha lo an ti vek a ni," a ti.

Lal Thanzara chuan, BJP chu an hlauhawm hle nia sawiin, "Demo­ne­tisation ringawt aṭang pawh hian BJP chu Mizoram hmelma a ni tih a chiang. Tih tum rûk, hidden agenda an neihte hi Mizo ringtute'n kan hriat a ngai a, pawisa tihthih hi bul an ṭanna chauh a ni," a ti a; BJP chungchangah kohhran ang pawha harh a hun hle nia a hriat thu a sawi.

Agriculture minister KS Thanga pawhin thu sawiin, pawisa tihthihin India economy a nghawng chhe nasa niin a sawi a, "A tihchhiat zawng zawng hi siam ṭha leh tur chuan hun rei tak a duh dawn a ni," a ti a; Goods and Services Tax (GST) hman hnuah Mizoramin Central aṭanga sum a hmuh a tlahniam hle nia sawiin, "Black Day kan hmang hi kan tih âwm rêng a ni," a ti bawk.

Black Day hmannaah hian MPCC chuan reso­lution an pass a; "Cheng 500 leh 1,000 note tithi tura thutlukna hian India mipui tan harsatna namên lo a thlen mai bakah, mi 100 aia tlem loin nunna an chán a, sang tam takin an hna an chàn bakah, GDP nasa takin a tihniam a. Hei vang hian MPCC chuan a na thei ang berin demonetization hi a dem a, PM Narendra Modi hi mipui hnena ngaihdam dil turin a phût tlat a ni," an ti.