NLUP anga miretheite chawikanna Programme ṭha a awm lo - CM Hawla

AH&Vety department chuan November 7, Thawhlehni khan Serchhip DC pisa tualah NLUP ṭanpuina an sem a; khuallian, chief minister Lal Thanhawla chuan, NLUP anga miretheite chawikanna programme ṭha a awm lo niin a sawi.

Chief Minister chuan, NLUP atan sorkar laipuiah pawisa an dil thu sawiin, "Sorkar laipuiin ṭha a tih em avangin kan dil zat let hnih sum min rawn pe hial a ni. Mirethei leh chhumchhiate chawikanna programme, NLUP ang a la awm lo. Sorkarin theih­tawpin mi harsa leh rahbi tleu tawhte chawikan a tum laiin, ṭhahnemngaih nachang hre lo tam tak an awm hi a pawi," a ti.

Mi hausate an harh a, ranvulh an uar huna sing tél an vulh chuan, tuna ṭan nachang hre lote chu mi hausate hnuaiah an inhlawh a ngai ang tih a hlauh thu sawiin CM Hawla chuan, "Sorkar ṭanpuina dawngtute an harh a ngai. Kut hnathawktute leh beneficiary-te pawh mi hausate hlawhtlin khalh a hun tak zet a ni," a ti a; sorkar ṭanpuina dawngtute an hlawhtling hman lo ang a, mi hausa hnuaiah an kûn a hlauh thu a sawi.

Lal Thanhawla chuan, NLUP chu mirethei leh khawsak harsa zawkte zawng chhuaktu programme a nih thu sawiin, "Rim taka thawk ṭhinte tana hlawh­tlinna kawng leh kut hna­thawktute'n an khawbu záwla mi hausate tlawn loa an intodelh theihna tura ruahmanna leh chhanchhuahna programme a ni," a ti.

NLUP ṭanpuina hi mi 459 hnenah sem a ni a, mi pakhatin vawk note paruk zel an dawng a ni.