Faina lama hmalak dan tur sawiho

Lunglei District Sanitation Task Force chu nimin khan an chairman Lalzarmawii, Lung­lei bawrhsap hoin a pisaah an ṭhukhawm a; Cleanliness Year (October 2, 2017 aṭanga October 2, 2018) leh faina kawnga sorkar laipui duan, Swachh Survekshan hmang hmalak dan turte an sawiho.

Lunglei DC chuan, faina kawnga hmasawn zel turin mi tinin ṭan an lak a ṭul thu a sawi a; hmalakna tura pawimawh a tih hrang hrangte member-te a sawipui a ni.

Lungleia UDPA officer Andrew Lalhruaia chuan, UDPA department-in October 2, 2017 aṭanga October 2, 2018 thleng Cleanliness Year-ah a puan thu sawiin, "Mizoram sorkarin Faina Kum a puan chhan ber chu, mipuite'n faina leh hriselna kawngah pên khat tala hma an sawn theih nan te, Swachh Bharat Mission thil tum hrang hrang tihhlawhtlin nante leh mipui mimirin fai duh tak takna thinlung an neih theih nan a ni," a ti.

Meeting-ah hian Cleanliness Year leh Swachh Survekshan 2018 atana inpuahchah dan tur tlangpuite sawiho a ni a; tuihâwk luankawr tihfai, khawpui hmun hrang hranga retaining wall hnawih var leh khawpuia vantlang bawlhhlawh báwm dahna turte sawiho a ni.