Lengpui-Mamit-Langkaih kawnga Hna thawh dan PWD-in an sawifiah

PWD chuan thuchhuah siamin, NH-44A, Lengpui-Mamit-Langkaih kawngpui double lane-a sial hna kum 2012 tawp lam aṭanga thawh ṭan tawh chungchang an sawifiah a; contractor-in harsatna hrang hrang a tawh hnuah, December 2016 aṭangin khawl cheng vbc. 40 man dah belhin, tunah hian beiseina thar nen PWD-in hma an lak ṭan thu an tarlang.

PWD tarlan danin, tunah hian hmun pathum, km. 33.150, km. 67 leh KM.102-naah lung herna khawl lian (stone crusher) leh alkatra khawl lian (hotmix plant) bun a ni a; lei laihna khawl lian (excavator) 58 (leh lo kal mek pahnih), tipper 46 (leh lo kal mek 20), JCB 10, motor grader pali, road roller pahnih, paver finisher pathum, water tanker pasarih, rock-breaker paruk, concrete mixer pali leh khawl dang eng emaw zat nen hna thawh mek a ni.

Kawng siam hna hi October 2017 tawp lam aṭanga chhunzawm niin, Tuidam thlang, Tumpang lui bula khawl hmangin granular sub-base(GSB) metre 380 phah tawh a ni a, chhunzawm zel a ni. Km. 67-naah khawl hmangin Mamit khawpui hêlna tur (diversion) km. 10-a thui sial tawhah km. 3.800-a thui blacktop zawh a ni tawh a, chu lai bik chu February 2018-ah zawh an beisei.

Dampui khaw hêlna (diversion), Tut lui aṭanga Mamit kawng thar km. 18 vela thui aṭangin km. 4.500-a thui sial zoin, kawng hmahruai (pilot road cutting) km. 6-a thui laih a ni tawh a; lung a awm nual avangin tun ṭhál chhungin zawh hman beisei a ni lo.

Rockfall area bypass road tia vuah, Lengte pêng aṭanga Dialdâwk lui inkar, km. 5-a thui kawng thar sial tur chu Ratna Infrastruture Projects, Hyderabad-in an sial ṭan ṭawh a; tun ṭhál chhunga laih zawh a, culvert leh retaining wall bakah, kawng chhuat eng emaw chen phah hman beisei a ni. He kawng hi cement concrete road (rigid pavement) double lane tur a ni.

NH-44A-ah hian hmun eng emaw zatah kawng hlui kalsan a nih avangin mipuiah harsatna a thlen tih an hriat thu tarlangin PWD chuan, "Ministry of Road, Transport & Highway lamah kawng kalsante hi a siamna kan dil ṭhin nâin, kawngpui zawh dawn hnaiah lo chuan sanction min pe thei si lo hi kan buaina a ni," an ti.