Ṭhuampui-Tuirial kawng siam ṭan a ni

NH-54, Ṭhuampui-Tuirial inkar chu November 7, Thawhlehni khan siam ṭan a ni. Sorkar thuchhuah tarlan danin, kawngpui hi khuain a zir chuan siam chhunzawm zel tur a ni a, tun ṭhál chhung ngeiin Tuirial lei thleng siam zawh hman tum a ni.

Kawng siam ṭan a nih theih nan hian November 6 tlai khan PWD engineer te, traffic police, local council leh YMA hruaitute'n kawng siam chhunga lirthei tlan dan tur an ruahman a; chutih laiin, Bawngkawn-Ṭhuampui (Zuang­tui pêng) inkarah SIPMIU-in pipe phûm an tum avangin, an phûm zawh hma chuan Bawngkawn-Ṭhuampui bik chu siam zawh mai theih a ni dawn lo.

PWD chuan, harsatna hrang hrang vanga an tum leh beisei anga kawngpui an siam lawk theih loh chhunga harsatna tuartute chungah ngaihdam an dil.

Contractor-in hna tluang leh ṭha taka a thawh theih nan hna thawktute tibuai lo a, enkawltute leh traffic police lam thu âwih turin mipui an ngen bakah, contractor hna duhthusam lo lai a awm chuan mahni thua hma la loin, PWD hotute hnenah thlen ṭhin turin an ngen.

Ṭhuampui-Tuirial inkar kawng siam turin contract agreement ziah aṭanga kum khat dawn hnuah pawh contractor-in awmze neia a thawh theih loh avangin PWD chuan November 1, 2017 hna thawk turin contractor thar Bhavya Construction, Silchar an thlang a ni.