I-Day-ah sikul 14 parade dawn Sikul hotute'n an huphurh
Covid-19 vangin sikul luh ṭan theih la ni lo mah se, Aizawla Independence Day lawmnaah Aizawl khawpuia sikul 14 chu parade tura tih an ni. Hetihlai hian sikul hotute chuan an huphurh hle.
Parade tura sorkarin a thlan sikul ṭhenkhat hotute chuan Vanglaini palai zawhna chhángin, sikul kai ṭan a la nih loh avangin naupang koh khawm huphurhawm an tih thu an sawi a, "Kan sikul naupang lut thar turte phei chu kan la hre hlawm lo. Chuvangin, tute nge parade tur hian kan koh ang, engtin nge kan koh khawm ang tihte ngaihtuah ngai tak a ni," an ti.
Sikul hotute chuan, Covid-19 vangin parade tura zirlai naupang tihluihna hmanga koh luih nuam an tih loh thu sawiin, "Thil pawi thleng palh ta se, kan mawhphurhna a ni dawn. Chuvangin, tunlai boruak angah chuan intihluih a nuam lo hle dawn a ni," an ti a; parade tura ngai zat pawh inhmuh zawh loh a hlauhthawnawm thu an sawi.
Sorkar thuneitute lamin nu leh pa phalna thlapa parade tur thlan tur ti se an duh thu sawiin sikul hotute chuan, "Nu leh pa phalna thlap a nih chuan kan tan pawh a ziaawm deuh ang. A huphurhawm khawp mai tun ang lai boruaka parade tura inkoh khawm chu," an ti.
Ministry of Home Affairs-in state leh union territory chief secretary-te hnena Independence Day hman dan tur hriattirna a thawnah chuan, hnam puanzar chibai bûk turte chu police, paramilitary force (sipai), home guards, NCC, scouts, etc. tih a ni.