KHAWTHLIR

Mi vit hlumtu hrem
Rosangliana Sailo (22) s/o Rohmingthanga, Lunglei Salem Veng chu Lunglei District Court chuan dam chhunga táng tur leh Rs. 10,000 chawi turin a chungthu a rêl a, Rs. 10,000 hi a pe thei lo a nih chuan thla khat dang tàn belh turin a ti bawk. Rosangliana Sailo hian March 30, 2017 khan a pi zing ṭawngṭai inkhawm báng chemtein a vit hlum a ni.

Thehluh theih
Transport department chuan notification chhuahin, ‘The Mizoram (Regulation and Control of Vehicles Parking) Rules, 2000’ siamṭhat (amend) tur atan Mizoram Gazette-ah draft rules tihchhuah a ni a, draft rules tihchhuah aṭanga ni 10 chhungin rawtna neite'n Transport Secretary hnenah thehluh theih a nih thu a tarlang a; "Mizoram sorkarin mipuite aṭanga rawtna lutte chu zir chiangin, rules siamṭhat turah telh tlak a awm chuan hman a ni ang," a ti.

Enumerator training
Economics & Statistics department chuan nimin khan Lunglei IPR conference hall-ah Baseline Survey in Village/Locality Profile siamna tur a enumerator-te tan training an buatsaih. Enumerator-te hi khaw tin/veng tinah kalin data an la khawm dawn a, village council leh local council-te leh chhung-kaw tinte ṭawiawmna an ngen a ni.

MPYCC hruaitu
Congress party president Lal Thanhawla chuan nimin khan Congress ṭhalai, Mizoram Pradesh Youth Congress Committee (MPYCC) office bearer turte a ruat thar. MPYCC president atan Dr Lalmalsawma, Kulikawn; vice president atan F Lalhmangaiha, Chanmari leh treasurer atan Laltawnliana, Zarkawt-te ruat an ni.

Jubilee lawm
Salvation Army, Thenzawl Bazar Corps chuan nimin khan an kum 25 tlin, silver jubilee leh an biak-in thar an lawm a, tlaiah ruai an ṭheh. SA Thenzawl Bazar Corps hi November 8, 1992-ah din a ni a, an biak-in thar chu July 5, 2014-ah sa ṭanin, cheng nuai 24 sêngin an sa a ni.