Covid-19 vei mi 23 hmuh belh Dam tawh mi 5 chhuahtir an ni

July 27, Thawhṭanni khan ZMC laboratory-a mi 358 swab sample endikah Covid-19 hripui vei mi 23 hmuh chhuah a ni a, nimin khan hripui vei dam tawh mi panga chhuahtir an ni thung. Mizorama Covid-19 vei hmuh tawh zawng zawng chu mi 384 an ni.

Sorkar thuchhuah tarlan danin, Thawh­ṭannia Covid-19 vei hmuh chhuah tharte chu mipa vek an ni a, Assam Rifles (AR) sipai 22 leh civil mi pakhat, Aizawl district-a mi vek an ni. Hriat theih chinah, Mizorama Covid-19 vei hmuh chhuah tawh zawng zawng mi 384 zinga mi 206 (53.65%) chuan an vei tawh lo (negative tawh) a, mi 178 (46.35%)-in an la vei. Endik nawnnaa vei tawh lo tih finfiah tawh mi pariat, Lungleia BSF mite chu CCC-ah enkawl an la ni mek thung.

Mizorama Covid-19 vei hmuh chhuah tawh mi 384-te chu mipa 287 leh hmeichhia 97 an ni a; an zinga mi 206 (53.65%) chu civil mi niin, mi 178 (46.35%) chu sipai an ni. Covid-19 positive mek mi 178 zinga a tam zawk 140 (78.65%) chu sipai an ni a, civil mi chu 38 (21.35%) chiah an ni tawh. July 27, Thawhṭannia Covid-19 vei hmuh chhuah mi 23 zinga Assam Rifles sipai 22-te chu kum 24-56 inkar an ni a, mi 21 chu state páwn hmun hrang hrang aṭanga tun hnaia Mizorama rawn lut an nih laiin, pakhat erawh chu Mizo a ni a, Mizorama awm sa, AR mi leh sa dangte aṭanga kai a ni thung. An vaiin Zokhawsanga AR quarantine facility-a khung hran lai an nih vek an nih bakah, harsatna nei (symptom lang) an awm rih lo tih sorkar thuchhuah chuan a tarlang.

Civil mi hripui vei hmuh thar pakhat erawh chu symptom a lan avanga State Referral Hospital-a dah luh tawh sa a ni a, kum 34 mi niin, tun hnaia Nepal aṭanga rawn haw a ni. ZMC laboratory-ah hian July 27 khan mi 358 - mipa 301 leh hmei­chhia 57 endik an ni a, State Referral Hospital (ZMC)-a damlo awm sa leh thawktu mi 29-te bakah, Aizawl, Lawngtlai leh Hnahthial aṭanga swab sample an dawnte leh, Assam Rifles mi 140-te an ni.

Covid-19 vei enkawl zinga National Disaster Response Force (NDRF) mi pa­hnih, Thenzawla Covid Care Centre (CCC) - AYUSH Hospital-a enkawlte chu an dam tawh avangin nimin khan chhuahtir an ni a; nimin tlai khan State Referral Hospital aṭang­in NDRF mi pahnih dang pawh chhuahtir an ni. Mamit district-a hripui vei la awmchhun hmeichhe naupang (nautê) kum 3 mi pawh nimin vek khan CCC aṭangin chhuahtir a ni bawk a; Mamit district-ah hripui vei an awm tawh rih lo.