President-in House-ah thu a sawi ; House-a member-te chêt ṭhin dan a fak

Zan khat riaka Mizoram rawn tlawhtu President Droupadi Murmu chuan nimin khan Mizoram Legislative Assembly special session-ah thu a sawi a, Mizoram Assembly House-a member-te chêt ṭhin dan a fak.

President chuan, Mizoram Assembly House-a member-te chêt ṭhin chu ropui a tih thu sawiin, "Hmun dang tan entawn tlak a ni. Zahawm taka session in kalpui thei hi a ropui a, chhawm nung zel ang che u. Tunah hian digital hmangin session in kalpui ṭan niin ka hria a, a lawmawm tak zet," a ti.

Mizoramin a leilung avangin harsatna a nei chungin tehna hrang hrangah hma a sawn zel tih sawiin Draupadi Murmu chuan, "Mizoram tana harsatna lian ber chu inkalpawhna a ni. Hei hi sutkian a nih chuan zirna leh hriselna kawnga hmasawnna mai bakah, mipui eizawnna a tihawlsam dawn," a ti a, kawngpui ngaih pawimawh a nih thu a sawi.

India President chuan, Mizoram mai bakah, hmarchhak state dangte hmasawnna chu ramin bung thar a kaina tan a pawimawh tih sawiin, "Asia chhimchhak leh Asia Pacific ramte nena inpawhna ṭha neih a nih theih nan hmarchhak state-te hi Act East Policy hnuaiah ngaih pawimawh an ni. Mizoram hi India-in a ṭhenawm ramte nena inpawhna ṭha zawk neih a tumnaa thâ thawhtu leh chhawrtu a nih ka beisei," a ti.

Droupadi Murmu chuan, India-in zalenna a hmuh kum 75-na chu hun kal tawh nena inzawm tlat kan nihzia a tarlang tih sawiin, hnam pasalṭhate inpumpekna chuan mi tin huapzo hmasawnna thlen turin mi tin hnenah chona thar pe se a duh thu a sawi bawk.

Governor Dr Hari Babu Kambhampati chuan, President-in thlan tlin a nih hnu rei lo te chhunga Mizoram a tlawh chu lawmawm a tih thu a sawi a, "Mizoram hi state muanawm tak, hnam hrang hrangte lungrual taka an awmna hmun a ni. President lo kal hian MLA-te chona thar pein, an hna ṭha lehzuala thawk turin a puih ngei ka ring," a ti.

Chief minister Zoramthanga pawhin thu sawiin, Droupadi Murmu chu campaign-a a rawn kal laiin a tlin chuan Mizorama rawn zin tura an sawi tih a tarlang a, a intiam ang ngeia Mizoram a tlawh vat avangin lawmthu a hrilh.

Zoramthanga chuan, Mizoram chu kum 20 chhung ram buai a nih thu sawiin, "India ram mai ni loah pawh ram buai berte zinga mi kan ni ang, khuate sâwi khâwm a ni. Tunah chuan, ram ralmuang tak kan ni tawh. Inremna thuthlung kan neih hi India ram mai ni loah pawh a ṭha ber zinga mi a ni ngei ang. Hmun dangah pawh an awt a ni," a ti.

Session kaihruaitu Assembly speaker Lalrinliana Sailo chuan, Droupadi Murmu chu India ram president 15-na leh tribal zinga president hmasa a nih avanga a lawmpui thu a sawi.

President Droupadi Murmu pual hian November 3, Ningani zan khan Raj Bhavan-ah cultural programme buatsaih a ni a; nimin zing khan Mizoram minister-te nen an inkâwm. Nimina Assembly House-a thu a sawi zawhah Ṭhuampui helipad aṭangin Lengpui Airport a pan a, chawhma dar 11:50-ah Lengpui aṭangin Sikkim panin Mizoram a chhuahsan a ni.