Rate bituk aia sanga chuan man late Thuneitu hnena thlen turin mipui chah

Mizoram Consumers Union (MCU) chuan, Aizawla taxi leh two wheeler taxi zingah chuan man (fare) uchuak taka la an awm ṭhin tih tarlangin, chutianga ti ṭhinte chu sim tur leh fimkhur turin an ngen a; rate aia sang uchuak taka late chu thuneitute hnena thlen ṭhin turin mipui an chah.

MCU chuan thu­chhuah siamin, taxi leh two wheeler taxi zingah fel leh hawihháwm tak tak, dan ang taka chuan man la an awm laiin, sorkarin rate a siam aia sang uchuak taka la ṭhin an awm thu an tarlang a, "Hei hi ram tan a pawi a, ram hmel tibâl thei, mipui náwlpui tana tawrhna thlen thei a ni a, hetianga tih chingte chu sim turin kan ngen a ni," an ti.

Chuan man sang uchuak taka late chu an lirthei number chhinchhiah a, thuneitute hnena thlen ṭhin turin MCU chuan taxi hmang­tute an chah.

Zualkona tur an tarlan­te chu - phone no. 9774993976, District Tran­sport Officer leh Dis­trict Consumer Commi­ssion (Consumer Court), Tuikhuahtlangte a ni a; online-in e-daakhil (edaakhil.nic.in) hmangin thubuai thehluh theih a ni bawk.

PASSENGER PHURTE RATE
(State Transport Authority siam)
1. Taxi (four wheeler): KM hmasa berah Rs 50, a dawtah KM khatah Rs 40 zel.
2. Two wheeler taxi: KM hmasa berah Rs 25, a dawtah KM khatah Rs 15 zel
3. Auto-rickshaw: KM hmasa berah Rs 30, a dawtah KM khatah Rs 20 zel.
4. Maxicab: Metal road-ah KM khatah Rs 3, metal road loah Rs 3.50.