Current-in mi a man vanga thihna thlengah Power & Electricity SDO suspend a ni

November 3, Ningani tlai dar 4 vel khan Power & Electricity department-a lineman (muster roll) Francis Rochungnunga (30) s/o Chhiahkama (L), Lawngtlai College Veng (Cheuràl) chu Lawngtlaia electric current siama electric bana a làwn laia kawlphethain a man avanga a thih chungchangah, Lawngtlaia PE department SDO Lalnghakliani chu chawlhtir (suspend) a ni.

Thu dawn danin, Francis Rochungnunga hian electric siam a ngaih avangin PE department control room lamin kawlphetha an tihtawp hnuah Lawngtlai AOC Venga electric banah láwnin a siam a; a siam zawh hma leh bana a awm laiin current tihnun a ni a, a man ta a ni.

Francis Rochungnunga hi electric current-in a man hnuah tla mai loin, electric ban leh hruiah a táng a, a hnu deuhah lâk thlâk niin, Lawngtlai District Hospital panpui a ni a, a nunna chhan hman a ni lo. Ningani zan khan an chenna inah lumen a ni a, niminah a ruang endik a nih hnuah an khua, Cheural panpui a ni.

Thil thleng avang hian Lawng­tlaia mi ṭhahnem tak chu lung­awi loin Ningani zan khan Lawng­tlaia PE department pisa tualah an pungkhawm a; Francis Rochung­nunga electric line a siam laia current tinungtute leh mawhphurtu officer-te hrem an phût.

Pungkhawmte chuan resolution an siam a; chhiatna thlen laia duty-te bàn ngei te, PE department Lawngtlai Division-a mawhphurtu ber a na thei ang bera hrem te, mitthi chhungte hnenah an phu tâwk zángnadawmna pek leh an thawh àwm tâwk hna pekte an phût a ni.

Thu dawn danin, mipui pung­khawmte hian Lawngtlaia PE department-a thawk, chhiatna thlenga mawhphurtute hremna thupek chhuah a nih hma chuan ṭin an tum loh thu an aupui a; Power & Electricity minister R Lalzirliana'n thil thlenga mawhphurtute chungah November 4, 2022 (Zirtawpni) chhun dar 12 rîk hma ngeiin hremna lek a nih tur thu LADC chief executive member V Zirsanga kaltlanga a hriattir avangin buaina lian tham thleng loin an ṭin darh a ni.

PE department minister R Lalzirliana chuan, Lawngtlai AOC Venga electric hrui siam laia chhiatna thleng chu pawi a tih tak zet thu leh Francis Rochungnunga chhungte a tawrhpui tak zet thu a sawi a, "Sorkar hian a enliam mai mai dawn lo a, Pu Francis-a chhungte'n a mawhphurtute rilru thianghlim tak púin an ngaidam a nih pawhin, he thihna thlenga a mawhphurtute chhui chhuak tur leh dan anga an phû tâwka an chungah hremna lek a nih ngei theih nan theihtawpin hma kan la dawn," a ti.

R Lalzirliana chuan, Francis-a chunga thil thleng ang hi a thlen nawn tawh loh nan a ṭul angin sorkarin theihtawp a chhuah zui dawn tih a sawi a; electric current kalsual leh intihpalhna thleng thei vanga thihna a thlen loh nan fimkhur zel turin mipui a ngen bawk.

E-in-C thu leh hla
Francis Rochungnunga thihna chungchangah hian PE engineer-in-chief Lalhmingliani Hmar chuan Ningani zan khan statement a siam nia sawi a ni. E-in-C thuchhuakah chuan, "Vawiin November 3, 2022-a Lawngtlaia electric accident avanga Francis Rochungnunga boral chungchangah PE department chuan pawi a ti tak zet a. He thil thleng hi ngun taka chhui a ni dawn a, thil thlenga mawhphurtu chu hrem ngei a ni ang," tia tarlan a ni.

Lawngtlai MLA hmalakna
Lawngtlai West bialtu MLA C Ngunlianchunga chuan November 3, 2022 vêk khan Chief Minister hnenah lehkha thawnin, PE department-a thawktute inthlahdah vang ni ngeia hriat theihin electric current man vangin October 14, 2022 khan Rûlkualah mi pathum leh November 3, 2022-ah Lawngtlaiah mi pakhat an thih thu a tarlang a, "Nunna chan ta mi pali-te hian an chhungkua, nupui leh fate neiin an kalsan a, a tuartu tan chuan a na tak zet a ni," a ti.

C Ngunlianchunga chuan CM hnenah hian electric current-in a man vanga mi pali thihna chu magisterial inquiry dina a mawhphurtute chhui chhuah a, hrem ngei a rawt a, "Mitthi chhungte hnenah zangnadawmna pawisa fai leh compasonate appointment pek an nih ngei theih nan ka rawn ngensak a ni," a ti a; PE department Lawngtlai Division dinhmun zir chian a, thawktu indaih lohna phuhrûk a nih theih nan hma la turin a ngen bawk.

Pawl dangte thuchhuah
Cheuràl Joint Action Committee leh Branch YMA-te chuan thuchhuah siamin, an khaw pa Francis Rochungnunga chunga thil thleng chu pawi an tih thu leh an lainat thu te, hriatthiam har an tih thu te, a chhungte an tawrhpui thute an tarlang.

Cheuràl JAC hian thil thlenga mawhphurtute a na thei ang bera hrem te, Francis Rochungnunga chhungte hnenah zángnadawmna pek te, a chhungte inenkawlna ngêlnghet ngaihtuahsak turtein Mizoram sorkar an phût a; PE department-a thawkte fimkhur lehzual turin an ngen bawk a ni.

Francis Rochungnunga khawsak mekna College Veng Branch YLA pawhin thuchhuah siamin, vanduaina thlen hun laia PE department control room-a duty-te leh mawhphurhna latu Sub Divisional Officer leh Junior Engineer-te chu bàn ngei an phût tih an tarlang a; Francis-a nupui fanaute hnenah zangnadawmna pek leh a nupui thawh àwm tâwk PE department-ah hna pe ngei turin sorkar an phût bawk.