ZMC doctor-in mi dang a kài chhàwng lo
Zoram Medical College (ZMC)-a doctor pakhat, July 20, 2020-a Covid-19 vei tih hmuh chhuahin a kai chhawn theih àwma ngaihte chu endik kim thaw khat a ni a, hripui vei hmuh chhuah an awm lo.
ZMC-a doctor pakhatin hripui a kài chhàwn theiha ngaih vanga swab sample endik zingah July 20 zana Malsawma's Yard-a futsal a khelhpuite leh an chhungte mi eng emaw zat leh, an inkhelh hnua inkhel ve Leitan leh a chhehvela mi 40 chuangte pawh an tel a; chu'ng mite chuan hripui an kai lo vek tih hmuh a ni.
ZMC doctor-in futsal a khelhpui - Grace Nursing Home & Research Centre leh City Hospital-a thawkte'n Covid-19 an vei lo tih finfiah a nih tâk avangin damdawi-in pahnihte chuan nimin khan thuchhuah inṭâwm an siam. "ZMC aṭanga test result chhuakah kan staff-te Covid-19 lakah an fihlim vek tih hriat a ni a, kan lâwm tak zet a ni," an ti a; an damdawi-inte chu nimin aṭang khan a pangngaiin an kalpui ṭan leh nghal tih an puang a ni.
Durtlang Leitan Local Task Force pawhin, an veng mite'n Covid-19 an kai loh avangin July 21 chhûn aṭanga an venga total lockdown an puan chu nimin zing aṭang khan hlih nghal a ni tih an puang bawk. Doctor-in Falkawna dawr pakhatah thil a lei vanga swab sample test ngaia ngaih mi palite pawh endik tawh niin, July 26, Pathianni khan result a chhuak a, Covid-19 an vei lo vek tih hmuh a ni. Falkawn Village Task Force chairman F Lalchhanchhuaha chuan, an khuaah nunphung pangngaia an awm leh tawh thu leh, fimkhur reng tura an inchah thu Vanglaini a hrilh.