Vairengteah kawng dan chhunzawm dawn

Land Owners' Association (Vairengte-Kawnpui Package 3-6 NH 06 & 306) chuan, national highway kawngpui zauhna atana an ram lakah zangnadawmna pe thuai tura Mizoram sorkar karna atan, November 3, 2022 aṭanga Vairengte daia kawng an dan chu vawiinah pawh an chhunzawm dawn.

Nimin tlaia Vanglaini palaiin a biak ṭuma Land Owners' Association hruaitute sawi danin, nimin khan Kolasib Addl. DC hoin official-te kawng danna hmunah hian an kal a ni. Mah se, an beisei leh duh ang thu ken an neih loh avangin kawng dan hi chhunzawm zel turin thutlukna an siam.

Land Owners' Association hruaitute chuan an member ṭhenkhatte chuan Bairabi lam luhka pawh dan an duh tawh tih sawiin, "Mizo mipuite hrek hi kan tum ber a nih loh avangin ni tin mamawh lakluhna zawng zawng dan chah chu ṭha kan ti loa, kan inkhap dai thei a ni. Vairengteah erawh kan la dang zel ang," an ti.

Vairengte daia kawng dan a nih avang hian state pawn aṭangin lirthei lut an awm loa, state pawna chhuak turte erawh dan an ni lo.