President Murmu-i'n hmeichhiate a kâwm

President Droupadi Murmu chuan November 3, Ningani khan Mizoram University Convocation a hmanpui zawhah MZU Auditorium-ah hmeichhe zirlaite leh zirtirtute bakah, self help group member-te a kâwm.

Droupadi Murmu chuan, Mizoramah hmeichhiate'n hma an sawn nasa nia a hriat thu sawiin, "Convocation neih zawh takah gold medalist zinga hmeichhia ṭhahnem tak an tel kha a lawmawm," a ti.

President chuan, "Sorkar hna bakah, ni tina eizawnna thilah hmeichhiate tan remchanna zau zawk siam a ngai a, bul ṭanna leh kutkawih eizawnna huangah pawh hmeichhiate'n hma an sawn zel theih nan chhawmdawlna ṭha zawk pek a ngai," a ti a; self help group uar zawka kalpui te, mi tam zawk tan hna thawh tur leh eizawnna a nih theih nan ṭan lak zel a ṭul thu a sawi.

Mizoram chu ram mawi tak, ramhmul leh nungcha chi hrang tam tak awmna a nih thu sawiin President chuan, "Hei vang hian biodiversity huangah Mizoram dinhmun a pawimawh a, Mizoram biodiversity humhim zel a nih theih nan MZU mithiamte'n hma an hruai a ngai," a ti a; ram leilung, thing leh mau leh nungchate humhim turin hmeichhiate pawhin mawhphurhna pawimawh tak an neih thu a sawi bawk.