Zoram Harh Rawh committee an ṭhukhawm

Champhai District Level Organising Committee on Zoram Harh Rawh chu nimin khan an chairman James Lalrinchhana, district bawrhsap kaihhruaiin DC conference hall-ah an ṭhukhawm.

Champhai district-ah chuan November 17 - 18, 2022 chhungin Kahrawt Field leh Community Hall-ah intihsiakna hi neih a ni ang. November 17-ah a hawnna, awareness campaign leh hnam lam intihsiakna neih ni se; November 18-ah hnam hla hmanga intihsiakna leh kharna hun buatsaih ni se, an ti. Program kimchang duanga, ṭul dangte buaipui turin Sub-Hqrs YMA, Champhai chu ruat niin, ṭhutkhawm leh hun atan November 14, 2022 an ruat a ni.

Zoram Harh Rawh campaign-ah hian Mizo hnam lam intihsiakna turin Cheraw (Kantluang) leh Khuallam te thlan a ni a, hla hmanga intihsiakna turin Darmani Zai chu hla inṭawm atana thlan a nih bakah, Lianrikhumi Zai, Awithangpa Tlawh Zai, Labour V Force Zai leh Domangi Zai-te zinga duh ber pakhat thlanga zai tur a ni dawn.

Hla hi chang thum thleng sak tur a ni a, hemi zai thluk hmanga hla awmsa emaw, thupui HIV/AIDS dona lam hawia hla phuah chawp leh cheimawite hman phal a ni. He huna telte tan hian HIV/AIDS Awareness Campaign leh mahni inhrechiang duhte tan thisen test theih a ni dawn a, media lamahte hmalaknate thlir theiha pholan ṭhin a ni dawn bawk.

Zoram Harh Rawh Campaign intihsiaknaah hian YMA Branch panga - Zotlang, Venglai, Kahrawt, Vengthlang leh Vengthar te tel turin an inhriattir tawh a, district inelna bika pakhatnain Rs 50,000, pahnihnain Rs 30,000 leh pathumnain Rs 10,000 an dawng dawn a ni.