PE Minister Zira báng turin an phût

Tun hnaia Lawngtlai leh a chhehvela electric current man avanga mi pali an thih avangin Mizoram Pradesh Youth Congress Committee (MPYCC) leh ZPM Ṭhalai chuan Power & Electricity minister R Lalzirliana chu a mawhphurhnaah laa báng turin an chah.

MPYCC chuan thuchhuah siamin, tun hnaiah Lawngtlai leh a chhehvela PE department hnuaia hnathawhna hmunah mi pali an thui chu pawi an tih thu leh thi chhungte an tawrhpui thu an tarlang a; "Chhiatna thlen chhante kha ngun taka kan zir chianin, thawktute inthlahdah vang liau liau a ni tih hi kan ngaihdan a ni. Chuvangin, mahni mawhphurhnaah laa bànna thehlut ngam turin PE Minister kan chah a ni," an ti.

November 3, Ningani tlaia Lawngtlaia chhiatna thlen veleha bialtu MLA C Ngunlianchunga'n theihtawpa hma a la chu fakawm an tih thu MPYCC chuan an sawi a; MLA-in a ngen angin, Lawngtlai AOC Venga electric current man vanga Francis Rochungnunga thih dan chu magisterial inquiry dina a mawhphurtu chhui chhuaka hrem tur te, mitthi chhungte hnenah zangnadawmna sum leh hna pe ngei turin Mizoram sorkar an phût tih an tarlang.

ZPM Ṭhalai chuan, district pakhat chhungah thla khat chhunga electric current man vanga mi pali an thi chu inrêlbàwlna hlawhchham vanga an ngaih thu an tarlang a, "A mawh latu ber chu PE minister a ni a, a department chanpual enkawl zo lotu Pu R Lalzirliana hi a rang thei ang bera PE minister a nihna bànsan turin kan phût a ni," an ti.

BJP, Lai Autonomous District pawhin thuchhuah siamin, Francis Rochungnunga thih dan chu pawi an tih thu leh department-a thawktute inthlahdah lutuk vanga an ngaih thu an tarlang.

Lai district BJP chuan, thil thleng chu rang taka chhui tur leh hrem ngai apiang na taka hrem tur te, bàn ngai an awm chuan bàn turtein PE Minister an phût a, "Minister hian action a la ngam lo a nih chuan minister a nihna aṭangin báng turin kan phût a ni," an ti.